Zbulohet data, Partia Demokratike thërret Kuvendin Kombëtar

Partia Demokratike ka vendosur të mbledhë Kuvendin Kombëtar më 30 maj 2026, në orën 11:00, duke bërë publike edhe axhendën zyrtare përmes Zyrës së Medias dhe Komunikimit.

Vendimi, sipas njoftimit, mbështetet në Statutin e partisë dhe vjen në një moment që synon adresimin e çështjeve më të rëndësishme politike në vend. Në fokus të diskutimeve do të jenë zhvillimet aktuale politike, sfidat që lidhen me procesin e integrimit evropian, si dhe problematikat që prekin funksionimin e demokracisë dhe shtetit të së drejtës.

Një ndër pikat më të rëndësishme të këtij Kuvendi pritet të jetë përcaktimi i strategjisë politike që do të ndjekë partia në vijim. Gjithashtu, gjatë mbledhjes do të prezantohen propozime konkrete për ndryshime në statut, të cilat do të diskutohen dhe hidhen për miratim nga delegatët.

Në axhendë përfshihen edhe iniciativa që synojnë modernizimin e strukturave të partisë, duke përfshirë projekte për dixhitalizimin, riorganizimin e brendshëm dhe zgjerimin e pranisë në diasporë.

Në përfundim të punimeve, Kuvendi Kombëtar do të zgjedhë edhe anëtarët e rinj të Këshillit Kombëtar, duke shënuar një hap të rëndësishëm në ristrukturimin dhe drejtimin e ardhshëm të partisë.