Zjarr në Kalivaç, digjen banesa dhe rrezikohet jeta e banorëve

Një zjarr i përmasave të mëdha ka përfshirë gjatë ditës së sotme zonën e Kalivaçit në Lezhë, duke krijuar rrezik serioz për banorët dhe banesat.

Flakët janë përhapur me shpejtësi në disa drejtime, të favorizuara edhe nga era e fortë që po përfshin zonën. Situata paraqitet e vështirë, pasi zjarri ka depërtuar në afërsi të banesave.

Si pasojë e përhapjes së flakëve, raportohet se janë djegur edhe disa banesa.

Në terren ndodhen banorë të zonës, ndërsa strukturat e emergjencave dhe shërbimet zjarrfikëse po punojnë për izolimin e vatrave dhe frenimin e përhapjes së zjarrit.

Për shkak të intensitetit të flakëve, erës dhe afërsisë me zonën e banuar, situata vijon të mbetet shqetësuese.

Deri në këto momente nuk ka informacion të plotë mbi numrin e banesave të dëmtuara apo nëse ka persona të lënduar. Autoritetet pritet të japin më shumë detaje në lidhje me situatën dhe ndërhyrjen në terren.