Zjarr në një banesë në Fier, raportohet për një viktimë

Një banesë është përfshirë nga flakët mbrëmjen e sotme në lagjen “Çlirim” të Fierit, ndërsa ngjarja ka përfunduar me një viktimë.

Sipas informacioneve paraprake, si pasojë e zjarrit ka humbur jetën një person, i cili mësohet se jetonte i vetëm në banesën e përfshirë nga flakët.

Menjëherë pas njoftimit për ngjarjen, në vendngjarje kanë mbërritur tre automjete zjarrfikëse, të cilat po punojnë për shuarjen e zjarrit dhe vënien nën kontroll të situatës.

Ndërkohë, Policia ka nisur verifikimet për të përcaktuar rrethanat e ngjarjes dhe shkaqet që kanë shkaktuar zjarrin.

Hetimet vijojnë për zbardhjen e plotë të rrethanave të ngjarjes.