Zyrtare/ Jep dorëheqjen presidenti i Federatës Italiane të Futbollit

Tashmë është zyrtare: Gabriele Gravina nuk është më në krye të Federatës Italiane të Futbollit. Gravina ka dhënë dorëheqjen gjatë një mbledhjeje urgjente me drejtuesit e ligave kryesore të futbollit italian dhe përfaqësues të sektorëve të ndryshëm të sportit.

Në takim morën pjesë përfaqësues të Lega Serie A, Serie B, Lega Pro, si dhe Shoqata e Trajnerëve dhe ajo e Futbollistëve.

Në fjalën hapëse të mbledhjes, Gravina konfirmoi vendimin e tij për t’u tërhequr nga drejtimi i “qeverisë” së futbollit italian, duke bërë të ditur njëkohësisht se më 22 qershor do të zhvillohen zgjedhjet për presidentin e ri të federatës.

Ndërkohë, kanë nisur të qarkullojnë edhe emrat e kandidatëve potencialë për ta pasuar atë. Mes tyre është Giovanni Malagò, një figurë e njohur në sportin italian, si dhe Giancarlo Abete, i cili ka drejtuar federatën në periudhën 2007–2014.

Në garë përmenden gjithashtu edhe Matteo Marani, ndërsa më në distancë mbetet kandidatura e Demetrio Albertini, i cili gëzon mbështetje nga komuniteti i lojtarëve.

Dorëheqja e Gravinës hap një fazë të re për futbollin italian, në një moment kur kërkohen reforma dhe një drejtim i ri për të përballuar sfidat organizative dhe sportive.