46-vjeçari kapet me 46 doza kokainë gati për shitje

Përditësuar më 18 Shtator 2021, 17:52

Një 46-vjeçar është arrestuar nga Policia e Tiranës, pasi gjatë kontrollit në automjetin e tij iu gjet një sasi kokaine e ndarë në doza të vogla gati për shitje.

46-vjeçari me inicialet D.K., u ndalua për kontroll nga uniformat blu të kryeqytetit teksa po kalonte me automjetin e tij në bulevardin “Bajram Curri”.

Gjatë kontrollit në makinë atij iu sekuestruan 46 doza me kokainë, çka bërri që të arrestohej në flagrancë.

Materialet në ngarkim të tij i kaluan prokurorsisë së Tiranës për veprime të mëtejshme, ndërkohë që 46-vjeçari tashmë duhet të përballet me akuzën e “Prodhimit dhe shitjes së narkotikëve”.

Njoftimi i plotë i policisë

Goditet nga Komisariati i Policisë Nr. 2, një tjetër rast i shpërndarjes së drogave të forta në doza.

Sekuestrohen 46 doza me lëndë narkotike kokainë.

Vihet në pranga poseduesi dhe njëkohësisht shpërndarësi i lëndës narkotike.

Sherbimet e Komisariatit të Policisë Nr. 2, në vijim të kontrolleve në qytet për rritjen e parametrave të sigurisë dhe goditjen e paligjshmërisë, në bulevardin “Bajram Curri” kanë ndaluar për kontroll automjetin me drejtues shtetasin D. K.

Gjatë kontrollit të çantës të dorës dhe të automjetit të tij, shërbimet e Policisë, gjetën 46 doza me lëndë narkotike kokainë, gati për shitje, të cilat u sekuestruan në cilësinë e provës materiale.

Në vijim të veprimeve nga specialistët për Hetimin e Narkotikëve në DVP Tiranë, arrestuan në flagrancë shtetasin D. K., 46 vjeç, për veprën penale “Prodhim dhe shitja e narkotikëve”.

Materialet i kaluan Prokurorisë pranë Gjykatës së Shkallës së Parë Tiranë, për veprime të metejshme.