48-vjeçari shqiptar arratiset nga burgu i Koridhalos në Greqi

Një incident i rëndë është regjistruar mëngjesin e sotëm në Greqi, ku një i burgosur ka arritur të arratiset nga burgu i sigurisë së lartë në Koridhalos, në Athinë.

Sipas të dhënave paraprake, bëhet fjalë për një shtetas shqiptar, 48-vjeçarin Edmond Tafa, i cili po vuante një dënim të gjatë për vepra penale që lidhen me trafikun e narkotikëve.

Arratisja dyshohet se ka ndodhur rreth orës 09:00, në një moment kur brenda institucionit po kryheshin procedura të zakonshme. Burime nga autoritetet greke bëjnë me dije se i dënuari ka shfrytëzuar një hapësirë sigurie në zonën e depos qendrore të materialeve, duke përfituar nga një derë e hapur dhe një moment mungese vëmendjeje nga ana e stafit.

Menjëherë pas konstatimit të mungesës së tij, është ngritur në alarm policia greke dhe janë aktivizuar kontrolle të gjera për kapjen e të arratisurit, ndërsa vijojnë hetimet për të zbardhur plotësisht rrethanat e ngjarjes dhe për të identifikuar përgjegjësitë e mundshme.