Zgjedhjet, PD-LSI dorëzojnë emrat për KZAZ-të. Çfarë roli do të kenë

Partia Demokratike dhe Lëvizja Socialiste për Integrim depozituan në Komisionin Qendror të Zgjedhjeve listat me anëtarët e tyre në Komisionet Zonale të Administrimit të Zgjedhjeve.

Edhe pse nuk janë regjistruar në zgjedhjet e 30 qershorit, dy partitë më të mëdha në opozitë, duke pretenduar për shkelje të rënda me procesin zgjedhor kanë vendosur të regjistrojnë anëtarët e tyre në çdo KZAZ.

Sekretari për Çështjet Zgjedhore të PD-së, Ivi Kaso, dhe përfaqësuesi i LSI-së depozituan në KQZ emrat e tyre dhe do të jetë vendimi që KQZ do të marrë që do të zyrtarizojë këtë kërkesë të opozitës. Kaso ka paralajmëruar çdo anëtar të KZAZ-ve se do të japin llogari ligjore për çdo veprim të kundërligjshëm që po kryejnë.

“Anëtarët tanë do të dokumentojnë në çdo Komision Zonal manipulimin e dokumentacionit apo tentativat për regjistrimin e kandidatëve në kundërshtim me ligjin.

PD paralajmëron sot çdo anëtar të Komisionit Qendror të Zgjedhjeve apo KZAZ-ve se do të mbajnë përgjegjësi penale për shpërdorim detyre për çdo shkelje të ligjit, për çdo regjistrim kandidatësh në kundërshtim me ligjin dhe me dokumente të falsifikuara”, tha Kaso.

Partitë e opozitës, përmes drejtuesve të tyre politikë, janë shprehur se zgjedhje në 30 qershor nuk do të ketë. Marrja e drejtimit të gjysmës së Komisioneve Zonale të Administrimit Zgjedhor nga opozita dhe realizimi i një skenari të mundshëm për tërheqjen e tyre gjatë ditës së zgjedhjeve mund ta vendosë në pikëpyetje të gjithë procesin në 30 qershor.

Ndërkohë, që në diskutim mund të jetë edhe arritja e një marrëveshjeje të mundshme mes palëve, kur edhe zërat ndërkombëtarë që kërkojnë dialog janë shtuar. Në rast të një skenari të tillë, me dërgimin e anëtarëve të saj në të gjitha KZAZ-të, opozita po përgatitet për të qenë në një proces, faktor i plotë dhe jo spektator i minutës së fundit.