Vladimir Gjuta sërish në pranga pasi masakroi kushëririn

Sipas burimeve, mësohet se kushëriri i Gjutës ka marrë dëmtime të rënda, pasi i janë thyer dhëmbët dhe një sy e ka të dëmtuar. Vladimir Gjuta është arrestuar në fillim të janarit dhe është lënë në burg edhe nga Gjykata e Tiranës. Burime të cilat kanë konfirmuar ngjarjen dhe arrestimin, thanë se dhunimi ka ndodhur te Rruga e Elbasanit në Tiranë, në shtëpinë e Vladimir Gjutës, ku kishte thërritur kushëririn.

Kujtojmë se Gjuta u arrestua në vitin 2015 në Tunelin e Kalimashit me paruke në kokë, teksa tentonte të arratisej jashtë vendit. Ai, së bashku me Ernest Gjutën dhe Baftjar Brukën, ishin arrestuar për ngjarjen e ndodhur në farmacinë e babait të ish-ministrit Tahiri.

GARDIANËT

Por ndërkohë që është lënë në burg nga Gjykata e Tiranës dhe është vendosur në paraburgimin 313, Gjuta ka dhunuar edhe persona që punojnë në burg. Për këtë shkak, është Drejtoria e Përgjithshme e Burgjeve që i ka kërkuar Prokurorisë të kërkojë masën e mjekimit të detyrueshëm për Gjutën, pasi nuk përballohet nga stafi. Do të jetë Prokuroria që do të vlerësojë dhe më pas të marrë një vendim nëse do të kërkojë një gjë të tillë, ndërkohë që vendimi mund të vijë vetëm pas aktekspertimeve për gjendjen e të paraburgosurit.

DHUNIMI I BABAIT

Në vitin 2016, 36-vjeçari nga Kukësi është arrestuar sërish sepse ka dhunuar babanë e tij të moshuar dhe bashkëshorten. Nga ana tjetër, veç dhunës në familje, ai akuzohej në atë kohë edhe për shkeljen e vendimit të Gjykatës së Kukësit, që kishte caktuar ndaj tij masën “Arrest shtëpie”. 36-vjeçari ka dhunuar fizikisht dhe psikologjikisht babanë e tij 78 vjeç, ndërsa pre e dhunës u tha se ishte edhe bashkëshortja e tij. Ka qenë vetë babai i Gjutës, që ka kërkuar ndihmën e Policisë, duke telefonuar në sallën operative. Më pas, shërbimet e Komisariatit nr.5 kanë shkuar menjëherë në vendngjarje, duke kryer arrestimin në Vladimir Gjutës.