Netanyahu reagon pas deklaratave të homologut britanik

Kryeministri izraelit Benjamin Netanyahu ka deklaruar se planet e Mbretërisë së Bashkuar për të njohur Palestinën si shtet “shpërblejnë” Hamasin.

Kryeministri i Mbretërisë së Bashkuar, Keir Starmer, njoftoi dje se do të ndërmarrë hapin e njohjes së Palestinës në një takim të OKB-së në shtator, nëse Izraeli nuk përmbush disa kushte.

Ai tha se plani do të vazhdojë nëse qeveria izraelite nuk ndërmerr “hapa thelbësorë për t’i dhënë fund situatës së tmerrshme në Gaza”, duke përfshirë një armëpushim, raporton BBC.

Rreth 140 vende e njohin zyrtarisht shtetin palestinez, ndërkohë që javën e kaluar Franca u zotua të njohë Palestinën në të njëjtin takim të OKB-së.

Kjo vjen ndërsa një organ i sigurisë ushqimore i mbështetur nga OKB-ja tha se “skenari më i keq i urisë po zhvillohet aktualisht” në Gaza.

Por Izraeli këmbëngul se nuk ka kufizime në shpërndarjen e ndihmës dhe se “nuk ka uri”.