Kukës, u kapën me lëndë narkotike, në pranga 3 shtetas

Policia e Kukësit ka goditur dy raste në fushën e narkotikëve, në kuadër të kontrolleve të shtuara për rritjen e parametrave të sigurisë dhe goditjen e veprimtarive të paligjshme.

Në bashkëpunim me shërbimet e Forcës së Posaçme “Shqiponja”, efektivët e DVP Kukës kanë ndaluar në qytet një automjet me tre persona në bord. Gjatë kontrollit fizik, tek drejtuesi i mjetit D. D. (20 vjeç), si dhe pasagjerët G. Sh. (18 vjeç) dhe V. E. (27 vjeç), u gjetën 14 doza me lëndë të dyshuar narkotike cannabis sativa, të ndara dhe të gatshme për shitje.

Të tre shtetasit, banues në Shëmri dhe Kukës, u arrestuan në flagrancë për veprën penale “Prodhimi dhe shitja e narkotikëve”.

Ndërkohë, në një rast tjetër, u procedua penalisht në gjendje të lirë shtetasi E. R., 28 vjeç, pasi gjatë kontrollit fizik iu gjet një sasi e vogël lënde e dyshuar si cannabis sativa.

Policia e Kukësit thekson se materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Kukës për veprime të mëtejshme.