Zgjedhjet/ Rama dërgon në Presidencë vakancat në 6 bashki

Kryeministri Edi Rama ka dërguar zyrtarisht në Presidencë shkresën që njofton vakancat në drejtimin e gjashtë bashkive kryesore të vendit: Tiranë, Vlorë, Berat, Mat, Cërrik dhe Tepelenë.

Ky dokument, i cili mban datën 30 shtator, i hap rrugë nisjes së procedurave institucionale për zëvendësimin e kryetarëve të shkarkuar nga Këshilli i Ministrave, pas vendimit të Gjykatës Kushtetuese që konfirmoi pavlefshmërinë e mandateve të tyre.

Në këtë listë përfshihet edhe Bashkia e Tiranës, ku një ditë më parë kryebashkiaku Erion Veliaj depozitoi në Gjykatën Kushtetuese një ankim për të kundërshtuar vendimin e Këshillit të Ministrave për shkarkimin e tij, duke e cilësuar atë të paligjshëm.

Pas kësaj nisme, procesi do të vijojë me vendimmarrjen e Presidentit të Republikës për caktimin e datës së zgjedhjeve të pjesshme vendore në këto bashki, duke shënuar një fazë të re në skenën politike vendore.