I ftuari ‘shpërthen’ në emision: Agjendat LGBTI, janë perversitete

Ligji për identitetin gjinor ka ndezur debate të ashpra edhe në “Top Story”, ku të ftuarit u përplasën mbi përmbajtjen e tij dhe ndikimin që mund të ketë në shoqërinë shqiptare, sidomos tek fëmijët.

Ndërsa një pjesë e panelit e cilësoi ligjin si një hap përpara në respektimin e të drejtave të njeriut, të tjerë paralajmëruan pasoja të rënda morale dhe sociale.

Amber Candy, një prej të ftuarave, theksoi se ky ligj ka në thelb barazinë gjinore dhe të drejtën e secilit për të qenë vetvetja:

“Ky ligj nuk ka lidhje me gjendjen civile. Gruaja mos të jetë më e nënshtruar si gjithmonë. Se si ndihesh ti në jetën tënde është punë për ty.”

Nga ana tjetër, Murat Basha reagoi ashpër, duke e cilësuar këtë qasje si “perversitet” që kërcënon strukturën tradicionale të familjes:

“Këto janë perversitete. Jam kundër. Shoqëria është ndërtuar mbi një themel moral. Sot për sot jeni një pakicë, nuk mund të infektohen fëmijët e vegjël me këto ide.”

Ndërkohë, Zhaklin Lekatari kundërshtoi idenë e referendumit për këtë ligj, duke theksuar se të drejtat e njeriut nuk mund të jenë objekt votimi popullor:

“Është kundër kushtetutës referendumi për të drejtat e njeriut. Ne mund të bashkëjetojmë në një shoqëri të ndryshme, por të barabartë.”

Në debat u përfshi edhe Fitim Zekthi, i cili tha se çështja gjinore nuk është vetëm çështje perceptimi, por edhe biologjie dhe tradite:

“Këto janë debate militante. Shoqëritë nuk i zgjidhin këto gjëra duke ia kaluar parlamentit. Duke u hapur kjo derë, mund të kemi edhe 72 variante gjinore, martesa mes gjinive të ndryshme apo adoptim nga çiftet e të njëjtit seks.”

Debati u mbyll me tone të larta, ndërsa secili mbeti i palëkundur në qëndrimin e tij, duke dëshmuar edhe njëherë se ligji mbi gjininë ka ndarë thellësisht opinionin publik shqiptar.