Në protestën e thirrur këtë të hënë nga opozita, nuk ka munguar as anëtari i Kryesisë së Partisë Demokratike, ish-deputeti Ervin Salianji.
Salianji, i cili prej javësh ka ndërmarrë ture me strukturat e PD-së duke nisur nga Durrësi, nismë që synon rikthimin e energjisë brenda partisë, ka vijuar kritikën ndaj grupimit të Foltores, duke kërkuar një revoltë të gjerë politike për të rrëzuar qeverinë.
Sot, në ditën simbolike të 8 dhjetorit — përvjetorin e lëvizjes studentore të vitit 1990 — ai u shfaq përkrah protestuesve në një tubim që konsiderohet kyç për mobilizimin e opozitës.
Kjo është foltorja e katërt radhazi e mbajtur nga opozita pas shpërthimit të skandalit që përfshiu ish-ministren Belinda Balluku, një zhvillim që ka ndezur debatet dhe tensionet në skenën politike.
