Sulmet e Ramës ndaj BKH, Shehaj: Fundi yt është para drejtësisë

Kreu i Partisë Mundësia, Agron Shehaj, ka hedhur akuza të forta ndaj kryeministrit Edi Rama, duke thënë se reagimet e tij të fundit tregojnë qartë frikë dhe pasiguri.

Sipas Shehajt, vizita e oficerëve të Byrosë Kombëtare të Hetimit në Kryeministri e ka vënë Ramën në pozita të vështira, gjë që – sipas tij – shpjegon edhe gjuhën e përdorur nga kryeministri në daljen e sotme publike. Ai thotë se në vend të transparencës, Rama ka zgjedhur sulmin, ironinë dhe fyerjet, në një përpjekje për të ushtruar presion ndaj hetuesve.

Shehaj shprehet se këto reagime nuk janë të rastësishme dhe paralajmëron se rruga që po ndjek kryeministri është e njëjtë me atë të shumë liderëve të Europës Lindore, të cilët përfunduan përballë drejtësisë për shkak të korrupsionit.

“Edi Rama është trembur! Është trembur shumë sepse i ka shkuar SPAK-në zyrë. Sot ka sulmuar oficerët e BKH-së, i ka sharë, i ka fyer, është tallur me ta, ka kërkuar t’i intimidojë. Por fundi i Edi Ramës është si të gjithë kryeministrat e tjerë të korruptuar të Europës së lindjes, para drejtësisë” është shprehur Shehaj.