Plas sherri, protestuesit e Lapajt përplasen e policinë

Partia “Shqipëria Bëhet” ka zhvilluar sot protestën e paralajmëruar para Kryeministrisë, e cila ka nisur me tensione dhe përplasje mes protestuesve dhe forcave të policisë.

Që në momentet e para, protestuesit janë përpjekur të afrohen drejt godinës së Kryesisë së Kuvendit, duke u përplasur fizikisht me efektivët e policisë që kishin ngritur perimetrin e sigurisë. Situata është tensionuar më tej mes thirrjeve kundër kryeministrit Edi Rama, ku dëgjoheshin slogane si “Edi Rama o hajdut” dhe “Edi Rama o frikacak”.

Sipas organizatorëve, protesta ka agravuar pasi policia ka tentuar të heqë foninë dhe podiumin e ngritur për fjalimet, ku kreu i partisë, Adriatik Lapaj, po mbante fjalën e tij para mbështetësve. Kjo ka sjellë reagime të forta nga protestuesit, të cilët e kanë cilësuar veprimin si përpjekje për të penguar tubimin.

Gjatë fjalimit, Adriatik Lapaj u bëri thirrje qytetarëve që të bashkohen dhe kërkoi dorëheqjen e kryeministrit, duke e akuzuar atë për mosmbajtje të premtimeve.

“Ftoj qytetarët të bashkohen dhe që Rama të dorëhiqet. Premtimet që dha, Rama gënjeu dhe nuk i mbajti. Është koha që brezi i ri të bashkohet. Është koha e së mirës kundër së keqes. Nuk trembem nga procedimet penale”, deklaroi Lapaj.

Protesta vijon nën masa të shtuara sigurie, ndërsa nuk raportohet për persona të lënduar deri në këto momente.