Bordi i Transparencës ua ngre përsëri shqiptarëve çmimin e naftës

Rritja e çmimit të karburanteve në vend ka marrë sërish një kthesë të papritur, vetëm një ditë pasi ishte vendosur ulja e tyre. Bordi i Transparencës së Hidrokarbureve ka vendosur në mbledhjen e fundit rritjen e menjëhershme të çmimeve të naftës dhe benzinës, duke reflektuar presionin e tregut dhe reagimet e forta të operatorëve.

Sipas vendimit të ri, nafta është shtrenjtuar me 15 lekë për litër, duke arritur në 218 lekë, ndërsa benzina është rritur me 6 lekë, duke shkuar në 181 lekë për litër në tregun me pakicë. Kjo lëvizje vjen pas kundërshtimeve të importuesve, të cilët argumentuan se vendimi i mëparshëm i uljes kishte vendosur çmime nën kosto, duke rrezikuar seriozisht aktivitetin e tyre.

Operatorët paralajmëruan se, nëse çmimet nuk do të rishikoheshin, furnizimi i tregut mund të vihej në rrezik për shkak të humbjeve të mëdha financiare. Kjo duket se ka ndikuar drejtpërdrejt në vendimmarrjen e fundit të autoriteteve.

Sipas përditësimit më të fundit, çmimet janë përcaktuar si më poshtë:

• Me shumicë: nafta 206 lekë/litër, benzina 169 lekë/litër
• Me pakicë: nafta 218 lekë/litër, benzina 181 lekë/litër

Ndërkohë, çmimi i gazit ka mbetur i pandryshuar.

Luhatjet e shpeshta të çmimeve po krijojnë pasiguri në treg dhe po ndikojnë drejtpërdrejt në xhepat e qytetarëve, ndërsa pritet të shihet nëse kjo rritje do të pasohet nga stabilizim apo ndryshime të tjera në ditët në vijim.