“Flakët s’kishin lidhje me materialet e ndërtimit”

Kryeministri Edi Rama ka reaguar sërish lidhur me zjarrin që përfshiu një nga pallatet e kompleksit “Arlis” në zonën e njohur si “Farmacia 10” në Tiranë, duke dalë në mbrojtje të kompanisë ndërtuese dhe duke kundërshtuar zërat që vënë në dyshim cilësinë e ndërtimit.

Në episodin e radhës të podcastit “Flasim”, Rama e cilësoi ngjarjen si një moment dramatik që për pak rrezikoi jetët e banorëve, por që përfundoi pa viktima falë ndërhyrjes së shpejtë të forcave zjarrfikëse dhe atyre të rendit.

Sa i përket shkaqeve të zjarrit, kreu i qeverisë theksoi se, sipas verifikimeve paraprake, bëhet fjalë për një incident të shkaktuar nga një shkëndijë, duke nënvizuar se nuk ka lidhje të drejtpërdrejtë me cilësinë e ndërtimit apo materialet e përdorura. Ai hodhi poshtë akuzat publike ndaj kompanisë, duke i cilësuar si spekulime nga persona pa ekspertizë.

Rama konfirmoi se godina e dëmtuar do të rindërtohet plotësisht nga vetë ndërtuesi, ndërsa shtoi se banorët e prekur nuk do të lihen vetëm. Sipas tij, deri në rikthimin në banesat e reja, familjet do të përfitojnë bonus qiraje dhe mbështetje nga bashkia për të përballuar situatën e krijuar.

Kryeministri theksoi gjithashtu se, pavarësisht debatit publik, verifikimet e para tregojnë se materiali i përdorur në ndërtim ishte i certifikuar dhe i importuar, duke përforcuar qëndrimin e tij në mbrojtje të kompanisë.

Ngjarja ka shkaktuar reagime të shumta në opinionin publik, ku një pjesë e ekspertëve dhe qytetarëve kanë ngritur pikëpyetje mbi standardet e sigurisë në ndërtim, ndërsa deklaratat e Ramës pritet të nxisin më tej debat mbi përgjegjësitë në raste të tilla.