Zbardhet ‘misteri’ i varrit të hapur me tunel në Lushnje

Një ngjarje e pazakontë dhe shqetësuese është zbardhur në Lushnjë, ku është konstatuar dëmtimi i një varri në varrezat e qytetit, duke ngritur dyshime se janë prekur edhe eshtrat e një gruaje të varrosur aty.

Sipas informacioneve zyrtare, autori i dyshuar është Edison Ngresi, 36 vjeç, i cili dyshohet se vuan nga probleme të shëndetit mendor. Ai është shoqëruar nga policia në komisariat për veprime të mëtejshme procedurale.

Ngjarja është zbuluar rreth orës 10:00 nga roja i varrezave, i cili ka konstatuar dëmtime në pjesën e sipërme të një varri. Dyshohet se është hapur një gropë nëntokësore, çka ka sjellë edhe prekjen e mundshme të eshtrave.

Grupi hetimor ndodhet në terren dhe po punon për të sqaruar plotësisht rrethanat e ngjarjes, si dhe për të dokumentuar çdo detaj që lidhet me këtë akt.

Burime paraprake bëjnë me dije se i njëjti person ka shfaqur edhe më herët sjellje problematike në zonë, çka po merret në konsideratë nga hetuesit në kuadër të zbardhjes së plotë të rastit.