Laboratori i kokainës në Frakull, kapet në Spanjë 49-vjeçari shqiptar

Një operacion i koordinuar mes autoriteteve shqiptare dhe atyre spanjolle ka çuar në arrestimin e një shtetasi shqiptar të shpallur në kërkim ndërkombëtar për çështje të rënda të trafikut të drogës.

Në kuadër të bashkëpunimit mes Interpol Tiranës dhe homologëve në Madrid, është lokalizuar dhe vënë në pranga në Spanjë 49-vjeçari Kevin Margjoni. Arrestimi i tij është kryer me qëllim ekstradimin drejt Shqipërisë, ku përballet me akuza të rënda penale.

Sipas vendimit të Gjykatës së Posaçme Kundër Korrupsionit dhe Krimit të Organizuar (GJKKO), ndaj Margjonit ishte caktuar masa e sigurisë “arrest në burg”. Ai akuzohet për përfshirje në trafikimin e lëndëve narkotike, në kuadër të një grupi të strukturuar kriminal, si dhe për pjesëmarrje në organizatë kriminale.

Burime nga hetimi bëjnë me dije se ai konsiderohet një nga personat e përfshirë në laboratorin e përpunimit të kokainës të zbuluar në Frakull të Fierit, një prej rasteve më të bujshme të goditjes së rrjeteve të drogës në vend.

Operacioni ndërkombëtar dhe arrestimi i tij përbëjnë një hap të rëndësishëm në vijim të hetimeve për këtë çështje, ndërsa pritet që procedurat për ekstradimin e tij drejt Shqipërisë të nisin në vijim.