Hetimet për trafik droge dhe prostitucion, arrestohet aktorja turke

Aktorja e njohur turke Beren Saat, e cila është bërë shumë e dashur për publikun shqiptar përmes roleve të saj në seriale të suksesshme, raportohet se është ndaluar nga autoritetet turke në kuadër të një operacioni të gjerë kundër aktiviteteve të paligjshme.

Sipas të dhënave zyrtare nga Zyra e Kryeprokurorit Publik të Stambollit, gjatë këtij aksioni janë arrestuar gjithsej 22 persona, ndërsa pesë të tjerë janë shpallur në kërkim dhe vijojnë të ndiqen nga autoritetet.

Në mesin e të ndaluarve përfshihen edhe figura të njohura të industrisë së argëtimit në Turqi, çka e ka bërë këtë operacion edhe më të bujshëm në opinionin publik. Hetimet paraprake lidhen me dyshime për përfshirje në veprimtari që përfshijnë trafikimin e lëndëve narkotike dhe prostitucionin.

Gjatë kontrolleve të ushtruara në disa ambiente banimi dhe adresa të ndryshme, forcat e antidrogës kanë sekuestruar substanca të dyshuara narkotike, si dhe materiale që mendohet se janë përdorur për shpërndarjen dhe organizimin e aktivitetit të paligjshëm.

Autoritetet turke kanë bërë të ditur se procedurat ligjore janë ende në fazë zhvillimi, ndërsa hetimet do të vijojnë për të përcaktuar rolin konkret të secilit prej të dyshuarve dhe për të zbardhur plotësisht rrjetin e dyshuar kriminal.