Akuzat ndaj kreut të Konkurrencës për arrogancë dhe mbrojtje të monopoleve

TIRANË – Arroganca e pushtetit dhe funksionarëve publikë po reflektohet gjithnjë e më hapur edhe te drejtuesit e institucioneve që kushtetutshmërisht duhet të ishin të pavarura. Në qendër të kritikave së fundmi është vendosur kreu i Autoritetit të Konkurrencës, Denar Biba, i cili po akuzohet se ka kthyer institucionin në një “mburojë” për operatorët e mëdhenj ekonomikë, duke lënë pas dore mbrojtjen e konsumatorëve shqiptarë.

Biba, i cili mori drejtimin e Autoritetit të Konkurrencës në vitin 2021 pas një karriere të gjatë dhe të debatueshme në Komisionin Qendror të Zgjedhjeve (KQZ), po përballet me një valë pakënaqësie publike dhe institucionale për shkak të qasjes së tij selektive ndaj problemeve të tregut.

One Albania nën “strehën” e Konkurrencës

Pika më nxehtë e debateve lidhet drejtpërdrejt me kompaninë celulare “One Albania”. Prej muajsh, qytetarët shqiptarë kanë denoncuar masivisht shërbimin e degraduar, ndërprerjet e shpeshta të valëve dhe, mbi të gjitha, rritjen e njëanshme dhe të kripur të tarifave mujore.

Por, ndërsa institucioni që ai drejton ka për detyrë të hetojë marrëveshjet e fshehta apo abuzimet me pozicionin dominues në treg, Autoriteti i Konkurrencës nuk ka konstatuar asnjë shkelje. Përkundrazi, në daljet e tij publike, Denar Biba ka marrë rolin e “avokatit” të kompanisë celulare. Ai ka argumentuar se ndryshimet e çmimeve janë të ligjshme pasi parashikohen në kontratat që vetë abonentët kanë nënshkruar, duke injoruar plotësisht faktin se konsumatorët shpesh gjenden përballë kontratave të detyruara (gati-formate) pa asnjë hapësirë negocimi.

Përplasja me KLSH-në dhe kërkesa për “super-kompetenca”

Përveç mbylljes së syve përpara ankesave të qytetarëve, Biba ka hapur një front përplasjeje edhe me Kontrollin e Lartë të Shtetit (KLSH). Gjatë raportimeve të tij, ai ka deklaruar se kërkesat e KLSH-së për të audituar dokumentet e brendshme cenojnë pavarësinë e Autoritetit të Konkurrencës. Ky qëndrim shihet nga kritikët si një tentativë për t’iu shmangur llogaridhënies, aq më tepër kur auditimet e fundit të KLSH-së kanë zbuluar problematika dhe mangësi serioze në funksionimin e vetë Autoritetit të Konkurrencës.

Nga ana tjetër, ndërsa refuzon kontrollin nga institucionet e tjera, Biba ka kërkuar që t’i shtohen kompetencat ligjore. Ai ka hedhur idenë që Autoriteti i Konkurrencës të ketë të drejtën e përdorimit të metodave hetimore (të ngjashme me ato të organeve ligjzbatuese apo policisë), gjë që ka ngritur dyshime mbi tendencën për të krijuar një strukturë me pushtet të pakufizuar, por pa kontroll bilanci.

Konsumatori i lënë në harresë

Qasja tolerante ndaj oligopoleve dhe bizneseve të mëdha, e ndërthurur me një retorikë që mbron interesat e korporatave në dëm të xhepave të qytetarëve, ka rritur pikëpyetjet mbi rolin real të këtij institucioni. Ndërsa çmimet e shërbimeve jetike rriten dhe cilësia bie, Autoriteti i Konkurrencës nën drejtimin e Denar Bibës duket më i shqetësuar për “pavarësinë” e vet nga auditimet sesa për mbrojtjen e konsumatorit nga skandalet e tregut të lirë.