AKEP “shtrëngon lakun” për Vodafone dhe One Albania, zbardhet vendimi i fundit

Autoriteti i Komunikimeve Elektronike dhe Postare (AKEP) ka miratuar ndryshime në rregulloren për mbrojtjen e konsumatorëve, duke parashikuar rregulla të reja për tarifat celulare, vlefshmërinë e kartave SIM dhe kreditin e papërdorur. Ndryshimet synojnë të rrisin transparencën dhe të forcojnë të drejtat e abonentëve.

Një nga masat kryesore do të hyjë në fuqi më 1 janar 2027. Nga kjo datë, operatorët nuk do të lejohen të përfshijnë në kontrata klauzola që parashikojnë rritje automatike të tarifave mujore në përqindje ose në bazë të indekseve të ndryshueshme, si Indeksi i Çmimeve të Konsumit, nëse vlera konkrete e tarifës së ardhshme nuk është përcaktuar që në momentin e lidhjes së kontratës.

Kartat SIM me vlefshmëri 12 muaj dhe më shumë të drejta për kredinë e papërdorur

Rregullorja e re parashikon që kartat SIM të kenë vlefshmëri 12-mujore, ndërsa kreditit monetar t’i garantohet një afat minimal prej 180 ditësh. Konsumatorët do të kenë gjithashtu mundësi të kryejnë rimbushje me vlera të ulëta.

Një tjetër ndryshim lidhet me të drejtën për të kërkuar rimbursimin e kreditit monetar të papërdorur në rastet kur numri celular bartet nga një operator te një tjetër.

Masat e reja përfshijnë edhe rritjen e transparencës për tarifat, si dhe ruajtjen e numrit celular për të paktën 12 muaj pas çaktivizimit.

Zbatimi i ndryshimeve do të bëhet sipas afateve të përcaktuara në rregullore, me masa që nisin nga 1 janari 2027.

One Albania do të testojë lidhjen e telefonave me satelitët Starlink

Në të njëjtën mbledhje, Bordi i AKEP autorizoi kompaninë One Albania të testojë për një periudhë 120-ditore teknologjinë satelitore Direct-to-Device (D2D), në bashkëpunim me Starlink/SpaceX.

Teknologjia D2D mundëson lidhjen e drejtpërdrejtë të telefonave celularë të përshtatshëm me satelitët, duke synuar përmirësimin e mbulimit në zona ku sinjali i rrjeteve tradicionale tokësore është i dobët ose mungon.

Testimi do të shërbejë për të vlerësuar mundësitë e përdorimit të kësaj teknologjie, e cila mund të krijojë alternativa shtesë komunikimi për përdoruesit në zona të largëta.

Meta description: AKEP ndryshon rregullat për tarifat celulare, kartat SIM dhe kreditin e papërdorur. Nga 2027 ndalohen disa klauzola për rritjen automatike të tarifave.