Rogerti ironizon Luiz Ejllin: Pardje me dy gishta, dje me Ramën!

Tensionet mes fituesit të “Big Brother VIP Albania 2”, Luiz Ejlli, dhe ish-finalistit të “Big Brother VIP Albania 5”, Rogert Sterkaj, vijojnë edhe jashtë shtëpisë më të famshme në Shqipëri, duke u zhvendosur tashmë në rrjetet sociale.

Raporti mes dy ish-banorëve u kris që gjatë qëndrimit 72-orësh të Luizit në edicionin e pestë të formatit, ku debatet e tyre u kthyen në një nga momentet më të diskutuara nga publiku. Edhe pas përfundimit të spektaklit, duket se përplasjet nuk janë zbutur.

Së fundmi, Luiz Ejlli paralajmëroi publikimin e një kënge të re me tematikë proteste, një projekt që ka shkaktuar reagime të shumta online. Mes komenteve ishte edhe ai i Rogert Sterkajt, i cili publikoi një reagim kritik në rrjetet sociale, që më pas u fshi, por u shpërnda me shpejtësi nga ndjekësit.

Në postimin e tij, Sterkaj ironizonte këngëtarin shkodran duke iu referuar një fotografie të tij gjatë një podcasti me kryeministrin Edi Rama:

“Bjondi zbuloi se këngët anti-Rama marrin klikime. Pjesa tjetër shkruhet vetë. Nga artist në komentator brenda natës – është qesharake se si funksionon ndikimi dhe presioni.”

Në një tjetër koment, ai shtoi me tone ironike:

“Bjondo, më duket më pak si një këngë proteste dhe më shumë si një strategji marketingu për projektin e ri. Urime, fratello!”

Reagimi që tërhoqi më shumë vëmendje ishte ai ku Sterkaj vë në dukje ndryshimin e qëndrimeve të Luizit:

“Pardje me dy gishta, dje me një grusht në podcast me Ramën, sot kundër Ramës dhe pasnesër me gishtin polic!”

Megjithëse postimi u fshi brenda pak minutash, deklaratat e tij u bënë virale, duke rikthyer në fokus përplasjen mes dy ish-banorëve dhe duke ndezur debatet mbi angazhimin publik të Luiz Ejllit dhe ndikimin e figurave publike në diskursin social.