Gjesti dënohet me 2 vite burg me kusht dhe 6 mijë euro gjobë

Këngëtari Gjesti është dënuar nga Gjykata Themelore në Prishtinë me dy vite burgim me kusht dhe 6 mijë euro gjobë, pas marrëveshjes për pranimin e fajësisë.

Çështja gjyqësore lidhet me konfliktin mes këngëtarit dhe pronarit të kompanisë “Onima”, Erkand Shabani.

Gjatë seancës gjyqësore, mbrojtja e Gjestit kërkoi që procedura të përmbyllej përmes një marrëveshjeje për pranimin e fajësisë. Kërkesa fillimisht u kundërshtua nga pala e dëmtuar, por më pas marrëveshja u pranua nga Gjykata Themelore në Prishtinë.

Në përfundim të procesit, gjykata vendosi që Gjesti të dënohet me dy vite burgim me kusht, ndërsa krahas kësaj ai duhet të paguajë edhe 6 mijë euro gjobë.

Dënimi me kusht nënkupton se këngëtari nuk do ta vuajë menjëherë dënimin me burg, për sa kohë që respekton kushtet e përcaktuara në vendimin e gjykatës.

Vendimi vjen pas përplasjes ligjore që lidhet me marrëdhëniet dhe mosmarrëveshjet mes Gjestit dhe Erkand Shabanit.