Ermal Jauri emërohet në krye të AKSIK, zëvendëson Altin Janin

Ermal Jauri është emëruar drejtor i Përgjithshëm i Autoritetit Kombëtar të Sigurisë së Informacionit të Klasifikuar (AKSIK), duke marrë drejtimin e institucionit pas largimit të Altin Janit.

Vendimi për ndryshimin në drejtimin e AKSIK është marrë nga Këshilli i Ministrave, me propozim të Kryeministrit dhe është firmosur nga zëvendëskryeministrja Albana Koçiu.

Sipas vendimit, Altin Jani është liruar nga detyra e drejtorit të Përgjithshëm të Autoritetit Kombëtar të Sigurisë së Informacionit të Klasifikuar, ndërsa në këtë pozicion është emëruar Ermal Jauri.

Jani kishte marrë drejtimin e AKSIK në vitin 2024. Ai ishte pjesë e këtij institucioni prej vitit 2012, përpara se të emërohej në krye të tij.

Ndryshimi është bërë në mbështetje të nenit 100 të Kushtetutës, si dhe dispozitave të ligjit nr. 10/2023, “Për informacionin e klasifikuar”.

Në vendimin e qeverisë përcaktohet se lirimi i Altin Janit dhe emërimi i Ermal Jaurit hyjnë në fuqi menjëherë. Akti parashikon gjithashtu botimin e vendimit në Fletoren Zyrtare.

Vendimi zyrtar

Në aktin e miratuar nga Këshilli i Ministrave përcaktohet:

• Altin Jani lirohet nga detyra e drejtorit të Përgjithshëm të Autoritetit Kombëtar të Sigurisë së Informacionit të Klasifikuar.
• Ermal Jauri emërohet drejtor i Përgjithshëm i Autoritetit Kombëtar të Sigurisë së Informacionit të Klasifikuar.
• Vendimi hyn në fuqi menjëherë dhe botohet në Fletoren Zyrtare.

Vendimi mban firmën e zëvendëskryeministres Albana Koçiu.