Njëri kthehet nga SHBA, tjetri niset drejt Strasburgut

Ndërsa pritet që kryeministri Edi Rama t’u drejtohet qytetarëve nga Aeroporti “Nënë Tereza”, në Rinas është shfaqur edhe kreu i Partisë Demokratike, Sali Berisha.

Sipas burimeve, Berisha pritet të udhëtojë drejt Strasburgut, ku do të ndjekë punimet e Këshillit të Europës dhe do të zhvillojë një sërë takimesh gjatë qëndrimit të tij.

Kreu i PD-së do të qëndrojë në Strasburg nga 28 shtatori deri më 1 tetor. Gjatë kësaj periudhe, ai pritet të ketë takime me përfaqësues të grupeve politike, si edhe me figura të ndryshme të politikës europiane.

Kontaktet e Berishës do të zhvillohen në kuadër të vizitës së tij në Strasburg, me fokus takimet me përfaqësues të institucioneve europiane dhe aktorë politikë të kontinentit.

Mbërritja e tij në Rinas vjen në një moment kur në aeroport pritet edhe komunikimi i paralajmëruar i kryeministrit Rama, i cili pritet t’u drejtohet qytetarëve pas kthimit nga New York-u.