Plagosje me armë zjarri në Tiranë, autori ende në kërkim (Emrat)

Një 22-vjeçar ka mbetur i plagosur me armë zjarri gjatë orëve të para të mëngjesit në Tiranë. Ngjarja është regjistruar rreth orës 01:00 në rrugën “Medar Shtylla”, ndërsa autori i dyshuar është shpallur në kërkim nga policia.

Sipas informacioneve paraprake, 28-vjeçari Sokol Zeka, i njohur edhe si Troka, dyshohet se ka qëlluar me armë zjarri ndaj 22-vjeçarit Elvis Zirka.

I riu i plagosur është transportuar në spital, ku po merr kujdesin e nevojshëm mjekësor. Deri më tani nuk janë bërë të ditura detaje të tjera mbi gjendjen e tij shëndetësore.

Pas ngjarjes, policia ka shpallur në kërkim 28-vjeçarin dhe po punon për lokalizimin dhe kapjen e tij. Ndërkohë, hetimet vijojnë për të zbardhur rrethanat e plagosjes, motivin e mundshëm dhe dinamikën e konfliktit që çoi në përdorimin e armës së zjarrit.

Autoritetet nuk kanë dhënë ende informacion të plotë mbi shkaqet që çuan në këtë ngjarje të ndodhur në kryeqytet.