Zbulohet skema e prostitucionit në Paris, 37-vjeçarja shqiptare “koka” e grupit

Një rrjet i organizuar prostitucioni me origjinë shqiptare është vënë në qendër të një hetimi të gjerë të autoriteteve franceze, që ka zbuluar një skemë aktiviteti të paligjshëm në zemër të Parisit, me lidhje financiare dhe organizative që shtriheshin deri në Shqipëri dhe Belgjikë.

Në fokus të dosjes hetimore është Mariela M., 37 vjeçe, e cila dyshohet se kishte një rol të rëndësishëm në administrimin e aktivitetit të prostitucionit në zonën e Porte de Vincennes, konkretisht përgjatë bulevardit Carnot, në distriktin e 12-të të kryeqytetit francez.

E arrestuar në shkurt të vitit 2026 dhe e mbajtur në paraburgim që prej datës 21 të atij muaji, shqiptarja është marrë zyrtarisht e pandehur për tutorim të rënduar të prostitucionit, trafikim të qenieve njerëzore dhe pastrim parash në kuadër të një grupi të strukturuar kriminal.

Së fundmi, ajo është paraqitur përpara Dhomës së Hetimeve në Paris, ku ka kërkuar lirimin nga burgu. Megjithatë, kërkesa e saj nuk është pranuar dhe paraburgimi është lënë në fuqi.

Sipas dokumentacionit hetimor, aktiviteti për të cilin dyshohet Mariela M. shtrihet në periudhën 2023-2026. Hetuesit kanë gjurmuar transferta bankare dhe dërgesa parash që arrijnë në një vlerë totale prej rreth 128 mijë eurosh. Vetë 37-vjeçarja ka pretenduar se ushtronte prostitucion prej pesë vitesh dhe se të ardhurat e saj javore varionin nga 1.000 deri në 2.000 euro.

Dëshmia që vuri në lëvizje hetimet

Zbulimi i aktivitetit nisi pas dëshmisë së një shtetaseje rumune, e cila ushtronte prostitucion në zonën ku vepronte grupi. Ajo u kishte treguar hetuesve të Brigadës për Luftimin e Tutorimit të Prostitucionit se ishte e detyruar të dorëzonte një pjesë të fitimeve te dy gra të tjera, të cilat kishin pozita drejtuese në këtë aktivitet.

Hetimet identifikuan Peluta M. dhe Mariela M. si dy personat që dyshohet se mblidhnin të ardhurat e prostitutave të tjera dhe më pas organizonin transferimin e tyre jashtë territorit francez.

Vëzhgimet policore dhe hetimet financiare zbuluan gjithashtu se gratë raportonin për aktivitetin e tyre te partnerët që jetonin në Shqipëri. Sipas dyshimeve të autoriteteve franceze, organizimi i rrjetit drejtohej nga Shqipëria, ku një rol të rëndësishëm kishin dy vëllezër me inicialet Z., të njohur më parë nga drejtësia franceze për përfshirje në veprimtari të ngjashme.

Një prej tyre, pavarësisht se ndodhej në burg, dyshohet se vazhdonte të jepte udhëzime përmes partneres së tij, duke ruajtur ndikimin mbi aktivitetin kriminal edhe nga qelia.

Lidhjet me Belgjikën dhe personi me pseudonimin “Klaudi”

Gjurmimi i parave çoi hetuesit edhe drejt Belgjikës, ku u identifikua një rrjet ndërmjetësuesish të dyshuar për përfshirje në grumbullimin e të ardhurave nga prostitucioni.

Në këtë skemë përmendet edhe një person i njohur me pseudonimin “Klaudi”, i cili dyshohet se kishte rolin e mbledhësit të parave. Sipas dosjes, ai kishte marrëdhënie intime me Mariela M. dhe Peluta M., dy gratë që dyshohet se administronin aktivitetin në terren.

Mariela udhëtonte drejt Belgjikës për t’u takuar me të dhe për t’i dorëzuar shuma parash të përfituara nga aktiviteti në Paris.

Përgjimet telefonike kanë nxjerrë në pah edhe komunikime që, sipas hetuesve, dëshmojnë për mënyrën se si funksiononte organizimi i përditshëm i rrjetit. Në një bisedë të datës 17 janar 2025, “Klaudi” i drejtohet Marielës me një gjuhë fyese, duke i kërkuar të merret me prostitutat që kishte nën menaxhim.

Automjetet zhvendoseshin për të shmangur policinë

Një tjetër element i zbuluar gjatë hetimit lidhet me mënyrën se si organizohej prostitucioni në bulevardin Carnot. Sipas dyshimeve të policisë franceze, Mariela M. kishte përgjegjësi për mbikëqyrjen e disa grave, organizimin e aktivitetit dhe administrimin e një pjese të të ardhurave të tyre.

Në skemë përfshihej edhe përdorimi i automjeteve si ambiente ku zhvilloheshin takimet me klientët. Makinat zhvendoseshin vazhdimisht në pika të ndryshme, me qëllim shmangien e vëmendjes së autoriteteve.

Për këtë pjesë të organizimit përmendet edhe një person me emrin Angel, i cili dyshohet se merrej me lëvizjen e automjeteve. Sipas përgjimeve, Mariela e kontaktonte vazhdimisht dhe i kërkonte ndihmë për çështje që lidheshin me makinat.

Dëshmitë e marra nga gratë që ushtronin prostitucion kanë dhënë versione të ndryshme për rolin e 37-vjeçares. Disa kanë refuzuar të flasin për përfshirjen e saj, ndërsa të tjera e kanë implikuar drejtpërdrejt në administrimin e aktivitetit.

Arrestimi në hotel dhe sekuestrimi i 9 mijë eurove

Mariela M. u arrestua më 17 shkurt 2026, së bashku me dy gra të tjera të dyshuara, gjatë një ndërhyrjeje në një hotel në Pantin, në departamentin Seine-Saint-Denis.

Pas arrestimit, ato u dërguan në ambientet e Policisë Gjyqësore në Porte de Clichy, në distriktin e 17-të të Parisit. Gjatë kontrolleve, autoritetet sekuestruan rreth 9.000 euro në para të gatshme.

Përballë hetuesve dhe gjyqtarit, 37-vjeçarja ka pranuar se ushtron prostitucion dhe se ka pasur një marrëdhënie intime me një person të përfshirë në këtë aktivitet. Megjithatë, ajo ka mohuar të ketë drejtuar rrjetin në bulevardin Carnot, të ketë mbledhur paratë e grave të tjera apo të ketë kryer transfertat financiare të përmendura në dosje.

Avokati i saj ka kërkuar lirimin nën masën e kontrollit gjyqësor, duke argumentuar se provat që lidhen me klienten e tij janë mbledhur tashmë dhe se ajo nuk duhet të mbahet në paraburgim për shkak të hetimeve që mund të zhvillohen në të ardhmen në Belgjikë apo Shqipëri.

Por prokuroria ka kundërshtuar lirimin, duke argumentuar se pozicioni që ajo dyshohet se kishte në organizatë dhe përmasat financiare të aktivitetit krijojnë rrezikun e rikthimit në veprimtari kriminale nëse lirohet.

Çështja e tretë ndaj rrjeteve shqiptare që prej vitit 2019

Dosja e Mariela M. është pjesë e një historie më të gjerë hetimesh të autoriteteve franceze ndaj rrjeteve shqiptare të prostitucionit në zonën e Porte de Vincennes.

Sipas të dhënave të bëra publike nga hetimi, kjo është çështja e tretë e këtij lloji e zhvilluar nga Policia Gjyqësore franceze që prej vitit 2019.

Në vitin 2023, një person i konsideruar si drejtues i një prej këtyre rrjeteve ishte dënuar me gjashtë vite burg pa të drejtë pezullimi të dënimit. Megjithatë, hetimet e reja tregojnë se aktiviteti i dyshuar ka vijuar, me ndryshime në organizim dhe zhvendosje të pikave ku ushtrohej prostitucioni.