“Mamica” sfidon “Skënderbeun”: Puçi dështoi, por unë sapo kam nisur!

Ish-kryetarja e Kuvendit dhe ish-ministrja e Jashtme, Elisa Spiropali, ka publikuar një mesazh të koduar në rrjetet sociale, i cili duket se i drejtohet drejtpërdrejt kryeministrit Edi Rama, në kushtet e përplasjes së hapur politike mes tyre.

Spiropali ka ndarë një fotografi ku shfaqet me një paraqitje revolucionare, duke e shoqëruar me një fjali që ka tërhequr vëmendjen: “Thanë puçi dështoi, por unë sapo kam nisur”.

Mesazhi vjen në një moment kur marrëdhëniet e saj me kreun e qeverisë dhe drejtuesin e Partisë Socialiste janë shoqëruar prej kohësh me tensione, ndërsa kritikat e saj ndaj mënyrës së drejtimit të partisë kanë nxitur pikëpyetje mbi raportin politik mes të dyve.

Nga teoria e “puçit” ndaj Ramës, te mesazhi i Spiropalit

Postimi i ish-kryeparlamentares vjen vetëm dy ditë pas një diskutimi televiziv në emisionin e mbrëmjes të drejtuar nga Blendi Fevziu, ku në qendër të vëmendjes ishin hetimet e SPAK-ut ndaj ish-zëvendëskryeministres Belinda Balluku.

Gjatë diskutimit u hodhën pretendime për një skenar të gjerë kundër qeverisë dhe kryeministrit, i cilësuar si një përpjekje për “puç”. Në këtë narrativë u përfshinë prokurorë të SPAK-ut, shërbime të huaja, oligarkë, përfaqësues të krimit të organizuar dhe pronarë mediash.

Edhe vetë Edi Rama ka përdorur termin “puç” në deklaratat e tij, veçanërisht në kontekstin e protestave kundër qeverisë.

Pikërisht për këtë arsye, zgjedhja e fjalëve nga Spiropali është interpretuar si një thumbim ndaj kryeministrit, ndonëse ajo nuk e ka përmendur drejtpërdrejt emrin e tij në postim.

Përplasja me Ramën, a ka nisur një betejë e re brenda PS-së?

Përplasjet mes Elisa Spiropalit dhe Edi Ramës nuk janë të reja. Ish-ministrja ka artikuluar më herët kritika për mënyrën se si drejtohet Partia Socialiste, duke vënë në pikëpyetje vendimmarrjen dhe funksionimin e brendshëm të saj.

Në këtë kontekst, mesazhi i fundit mund të shihet si një tjetër sinjal se Spiropali nuk ka ndërmend të tërhiqet nga qëndrimet e saj kritike.

Megjithatë, mbetet për t’u parë nëse kjo deklaratë do të shoqërohet me hapa konkretë politikë dhe nëse përplasja do të marrë përmasa më të mëdha brenda Partisë Socialiste.