Zbardhet dëshmia e Robert Dukës: I lashë në kazino, shlyeva edhe borxhet

Robert Duka, i njohur edhe me emrin Albert, ka treguar para hetuesve se çfarë ka bërë me paratë e përfituara nga grabitja e dy filialeve bankare në Tiranë, ku shuma e marrë dyshohet se kalon 100 mijë euro. Në dëshminë e tij, 50-vjeçari ka pranuar se një pjesë të konsiderueshme të parave e ka shpenzuar në kazino të ndryshme të kryeqytetit, ndërsa një tjetër pjesë e ka përdorur për të shlyer detyrime financiare.

Sipas deklarimeve të tij, pas grabitjeve Duka ka frekuentuar disa kazino në Tiranë, ku ka luajtur me paratë e marra nga dy filialet bankare. Ky pretendim ka bërë që grupi hetimor të kërkojë informacion nga subjektet përkatëse, me qëllim verifikimin nëse 50-vjeçari ka qenë klient i regjistruar dhe përcaktimin e shumave që mund të ketë shpenzuar.

Një tjetër pjesë e parave, konkretisht 6 mijë euro, mësohet se është shpërndarë te dy persona në Vlorë. Sipas hetimeve, Duka u ka dhënë nga 3 mijë euro secilit prej tyre. Të dy personat janë marrë në pyetje nga grupi hetimor, ku kanë deklaruar se shumat e marra nuk lidheshin me grabitjen, por përfaqësonin para që 50-vjeçari ua kishte pasur borxh.

Ndërkohë, një pjesë e konsiderueshme e shumës së grabitur është gjetur në banesën e Dukës në Vlorë, qytet ku ai kishte vendosur të jetonte, ndërsa në Tiranë qëndronte në një banesë me qira.

Në kuadër të hetimeve është marrë në pyetje edhe bashkëshortja e tij, e cila rezulton të jetë e punësuar në një bankë të nivelit të dytë. E pyetur për paratë e gjetura në banesë, ajo ka deklaruar se bëhej fjalë për kursime familjare, të krijuara nga shitja e një apartamenti në kryeqytet.

Hetuesit po verifikojnë deklarimet e personave të përfshirë, si dhe destinacionin e shumës së grabitur, për të sqaruar plotësisht mënyrën se si janë përdorur paratë dhe nëse nga ngjarja kanë përfituar edhe persona të tjerë.