Sot jepet aktgjykimi për Thaçin dhe katër të bashkakuzuarit për “pengim të drejtësisë”
Dhomat e Specializuara të Kosovës në Hagë pritet të shpallin këtë të martë, më 17 nëntor 2026, aktgjykimin në procesin gjyqësor ndaj ish-presidentit të Kosovës, Hashim Thaçi, dhe katër të bashkakuzuarve të tjerë për vepra penale që lidhen me pengimin e administrimit të drejtësisë.
Seanca është caktuar të nisë në orën 10:00 dhe, sipas urdhrit të gjyqtarit të vetëm të çështjes, Christopher Gosnell, të pesë të akuzuarit duhet të jenë fizikisht të pranishëm në selinë e gjykatës në Hagë. Shpallja e vendimit do të zhvillohet në seancë publike.
Përveç Thaçit, në këtë proces gjyqësor janë të akuzuar Bashkim Smakaj, ish-drejtor i Agjencisë së Kosovës për Inteligjencë (AKI), Isni Kilaj, ish-kryetar i Komunës së Malishevës, Fadil Fazliu dhe Hajredin Kuçi, ish-ministër i Drejtësisë së Kosovës.
Çështja po gjykohet nga Dhomat e Specializuara të Kosovës, një institucion gjyqësor me seli në Hagë, i krijuar në bazë të legjislacionit të Kosovës. Ky proces është i veçantë nga gjykimi kryesor për krime lufte ndaj ish-krerëve të Ushtrisë Çlirimtare të Kosovës dhe ka në fokus pretendimet për ndërhyrje në dëshmitë e personave të thirrur nga Prokuroria.
Çfarë pretendohet në aktakuzë?
Aktakuza ndaj pesë të pandehurve u konfirmua më 29 nëntor 2024 dhe u bë publike më 6 dhjetor të po atij viti. Dokumenti u ndryshua më 16 prill 2025, pas një vendimi të mëparshëm të Panelit të Gjykatës së Apelit.
Sipas Zyrës së Prokurorit të Specializuar (ZPS), periudha që përfshihet në hetim nis më 12 prill dhe përfundon më 2 nëntor 2023. Prokuroria pretendon se gjatë vizitave të veçanta në objektin e paraburgimit në Hagë, Hashim Thaçi u ka përcjellë Bashkim Smakajt, Isni Kilajt dhe Fadil Fazliut informacione konfidenciale për dëshmitarët e saj, si dhe u ka dhënë udhëzime për të ndikuar në dëshmitë e tyre.
Sipas aktakuzës, këto veprime dyshohet se janë kryer me qëllim pengimin e zyrtarëve të Dhomave të Specializuara në ushtrimin e detyrave të tyre zyrtare. Prokuroria pretendon gjithashtu se Thaçi kishte bashkërenduar tri grupe të veçanta, me përfshirjen e tre të bashkakuzuarve dhe personave të tjerë ndaj të cilëve nuk janë ngritur akuza.
Një pjesë tjetër e aktakuzës lidhet me ish-ministrin Hajredin Kuçi. Sipas pretendimeve të Prokurorisë, Thaçi kishte rënë dakord me Kuçin që ky i fundit të kontaktonte dëshmitarë të Zyrës së Prokurorit të Specializuar në procesin kryesor për krime lufte, në kundërshtim me urdhrat e gjykatës dhe procedurat e përcaktuara për komunikimin me ta. Kuçi akuzohet gjithashtu se ka kontaktuar më vete një tjetër dëshmitar të Prokurorisë.
Me sa akuza përballen pesë të pandehurit?
Sipas aktakuzës së konfirmuar, Hashim Thaçi përballet me 11 akuza gjithsej: tri për tentativë të pengimit të personave zyrtarë në kryerjen e detyrave të tyre, katër për shkelje të fshehtësisë së procedurave dhe katër për mosbindje ndaj gjykatës.
Bashkim Smakaj, Isni Kilaj dhe Fadil Fazliu akuzohen secili për nga dy vepra penale: një për tentativë të pengimit të personave zyrtarë në ushtrimin e detyrave zyrtare dhe një për mosbindje ndaj gjykatës.
Ndërsa Hajredin Kuçi përballet me dy akuza për mosbindje ndaj gjykatës, të lidhura me pretendimet për kontaktimin e dëshmitarëve jashtë procedurave të lejuara.
Të pesë të pandehurit janë deklaruar të pafajshëm për të gjitha akuzat që rëndojnë ndaj tyre.
Sa vite burg ka kërkuar Prokuroria?
Në përfundim të procesit gjyqësor dhe gjatë deklaratave përmbyllëse, Zyra e Prokurorit të Specializuar kërkoi që Hashim Thaçi të dënohet me gjashtë vite burgim. Prokuroria kërkoi gjithashtu që periudha e kaluar prej tij në paraburgim të mos zbritet nga dënimi i mundshëm.
Për Bashkim Smakajn, Isni Kilajn dhe Fadil Fazliun, organi i akuzës kërkoi nga tre vite burgim për secilin, ndërsa për Hajredin Kuçin propozoi nëntë muaj burg.
Si pjesë të materialit provues, Prokuroria ka përdorur edhe regjistrime të bisedave të zhvilluara gjatë vizitave në qendrën e paraburgimit në Hagë. Sipas pretendimeve të saj, 28 incizime të realizuara gjatë nëntë vizitave, përgjatë një periudhe katërmujore, mbështesin dyshimet për përpjekje për të ndikuar te dëshmitarët.
Gjykimi nisi më 27 shkurt 2026, ndërsa paraqitja e provave përfundoi më 5 gusht. Deklaratat përmbyllëse të palëve u zhvilluan nga 10 deri më 14 shtator, datë kur gjyqtari i vetëm e shpalli çështjen të mbyllur dhe nisi faza e shqyrtimit për marrjen e vendimit.
Proces i veçantë nga gjykimi për krime lufte
Çështja për pengimin e administrimit të drejtësisë nuk duhet ngatërruar me procesin kryesor ndaj ish-presidentit Hashim Thaçi dhe tre ish-drejtuesve të tjerë të UÇK-së, Kadri Veseli, Jakup Krasniqi dhe Rexhep Selimi.
Në atë proces, katër ish-krerët e UÇK-së u përballën me akuza për krime lufte dhe krime kundër njerëzimit. Më 16 shtator 2026, Thaçi u dënua me 25 vite burgim në këtë çështje.
Ndërsa vendimi që pritet të shpallet sot ka të bëjë vetëm me përgjegjësinë penale të Thaçit dhe katër të bashkakuzuarve të tjerë për veprat që lidhen me administrimin e drejtësisë në procedurat e Dhomave të Specializuara të Kosovës.
Keni një histori? Denonco anonimisht, identiteti juaj mbrohet.
Denonco



