Ulen çmimet e karburanteve, ja me sa do shiten nafta dhe benzina
Bordi i Transparencës ka vendosur uljen e çmimeve të karburanteve në tregun shqiptar. Sipas vendimit të ri, nafta do të tregtohet me 204 lekë për litër, nga 210 lekë që ishte më parë, duke pësuar një ulje prej 6 lekësh.
Edhe benzina do të shitet me çmim më të ulët. Një litër benzinë do të kushtojë 163 lekë, nga 165 lekë që ishte deri më tani, me një reduktim prej 2 lekësh.
Çmimet e reja do të hyjnë në fuqi këtë të mërkurë, më 18 nëntor, në orën 13:30 dhe do të mbeten në fuqi deri në mbledhjen e ardhshme të Bordit të Transparencës, kur mund të shqyrtohen ndryshime të tjera në varësi të zhvillimeve të tregut.
Çmimet e reja të karburanteve
Sipas vendimit të marrë më 18 nëntor 2026, kufijtë maksimalë të çmimeve janë përcaktuar si më poshtë:
- Nafta (gazoil): 204 lekë/litër në shitjen me pakicë dhe 192 lekë/litër me shumicë.
- Benzina: 163 lekë/litër në shitjen me pakicë dhe 151 lekë/litër me shumicë.
- Gazi për automjete: 71 lekë/litër në shitjen me pakicë dhe 59 lekë/litër me shumicë.
- Nafta për aktivitetin e peshkimit: 109 lekë/litër.
Bordi ka rikujtuar gjithashtu se të gjithë operatorët që ushtrojnë aktivitet në tregtimin me shumicë dhe pakicë të karburanteve janë të detyruar të zbatojnë çmimet e përcaktuara në vendim.
Për subjektet që konstatohet se shkelin këto kufizime parashikohet edhe pezullimi i aktivitetit.
Vendimi është marrë në kuadër të mekanizmit të kontrollit të përkohshëm të çmimeve në tregun e hidrokarbureve, ndërsa institucionet përgjegjëse deklarojnë se synojnë mbrojtjen e konsumatorëve dhe garantimin e konkurrencës së ndershme.
Për drejtuesit e automjeteve, ndryshimi më i ndjeshëm është ulja me 6 lekë për litër e naftës, ndërsa benzina pëson një reduktim më të kufizuar, prej 2 lekësh.
Keni një histori? Denonco anonimisht, identiteti juaj mbrohet.
Denonco



