Aksident i trefishtë në Lezhë, raportohet për disa të plagosur

Një aksident i trefishtë rrugor është regjistruar pak minuta më parë në zonën e Ishull-Lezhës, pranë hyrjes së qytetit, duke shkaktuar panik dhe bllokim të qarkullimit në këtë segment.

Sipas informacioneve paraprake, në përplasje janë përfshirë tre automjete, ndërsa tre persona kanë mbetur të lënduar. Të plagosurit janë transportuar me urgjencë drejt spitalit për të marrë ndihmën e nevojshme mjekësore. Deri më tani nuk dihet gjendja e tyre shëndetësore.

Për shkak të aksidentit, qarkullimi i automjeteve në hyrje të Lezhës është rënduar ndjeshëm, duke krijuar radhë të gjata dhe vonesa për drejtuesit e mjeteve. Forcat e policisë kanë mbërritur në vendngjarje dhe po punojnë për të zbardhur rrethanat e përplasjes, si edhe për të normalizuar trafikun në zonë.

Hetimet pritet të sqarojnë shkaqet e aksidentit dhe përgjegjësitë e mundshme të drejtuesve të mjeteve të përfshira.