Albin Kurti s’pyet për presidenten, refuzon dekretin e Vjosa Osmanit

Kriza politike në Kosovë po thellohet pas dështimit të seancës për zgjedhjen e presidentit të ri. Kryeministri Albin Kurti ka deklaruar se nuk e pranon dekretin e presidentes Vjosa Osmani për shpërndarjen e Kuvendit dhe mbajtjen e zgjedhjeve të reja, duke theksuar se vendimi përfundimtar duhet të merret nga Gjykata Kushtetuese e Kosovës.

Në një konferencë për mediat, Kurti u shpreh se nuk mund të flitet për zgjedhje të reja pa një vendim të qartë nga Kushtetuesja. Sipas tij, organizimi i zgjedhjeve në këtë moment vetëm sa do ta zgjaste krizën institucionale.

Kryeministri falënderoi 66 deputetët e shumicës parlamentare që morën pjesë në seancën e fundit të Kuvendi i Kosovës, duke theksuar se ata respektuan detyrimin kushtetues për të marrë pjesë në procesin e zgjedhjes së presidentit. Ai akuzoi opozitën, Partinë Demokratike të Kosovës, Lidhjen Demokratike të Kosovës dhe Aleancën për Ardhmërinë e Kosovës, si dhe Listën Serbe për bojkotimin e seancës.

Sipas Kurtit, mungesa e deputetëve të opozitës bëri të pamundur arritjen e kuorumit prej 80 deputetësh, i domosdoshëm për zhvillimin e votimit për kreun e shtetit.

Seanca parlamentare e zhvilluar një natë më parë u ndërpre nga kryetarja e Kuvendit, Albulena Haxhiu, pikërisht për shkak të mungesës së kuorumit. Në sallë ishin të pranishëm vetëm deputetët e shumicës.

Fillimisht, kandidatura e vetme për president ishte Glauk Konjufca nga Lëvizja Vetëvendosje. Më vonë, shumica parlamentare paraqiti edhe kandidaturën e Fatmire Kollçaku-Mullhaxha për të përmbushur kërkesën procedurale që gara për president të ketë të paktën dy kandidatë.

Paralelisht, presidentja Osmani kishte propozuar edhe ndryshime kushtetuese që do të mundësonin zgjedhjen e presidentit drejtpërdrejt nga qytetarët, por propozimi nuk arriti të miratohej në parlament.

Pas ndërprerjes së seancës, kryetarja e Kuvendit i është drejtuar Gjykatës Kushtetuese me kërkesë për pezullimin e afateve kushtetuese që lidhen me zgjedhjen e presidentit, duke e çuar krizën politike drejt një beteje juridike.