Ana Lika rrëfen historinë e dashurisë me Bjordin: U takuam në një vaki!

Aktorja Ana Lika ka rrëfyer me sinqeritet historinë e njohjes dhe lidhjes së saj me partnerin, Bjordi Mezini, duke treguar se gjithçka nisi pa asnjë shkëndijë dashurie.

Ajo shpjegon se njohja e parë ka ndodhur në ambientet e Top Channel, ku më pas, për shkak të profesionit, rrugët e tyre janë kryqëzuar sërish në bashkëpunime të ndryshme.

Sipas Anës, lidhja e tyre nuk ishte aspak dashuri me shikim të parë, madje e kundërta:

“Mendoj që ishte dhe zgjedhje e Bjordit në heshtje që lidhja jonë ishte hermetike. Ne u gjendëm shumë mirë bashkë pasi punonim dhe bashkë. Nuk besoj që ishte dashuri me shikim të parë. Nuk e kam pasur qejf. Mbaj mend takimin e parë me Bjordin, ku ka qenë i ftuar në ‘Pa limit’ këtu në Top Channel. Nuk më pëlqeu dhe unë e urreva.”

Ajo tregon se pas disa vitesh janë takuar rastësisht në një ceremoni mortore, ku Bjordi i ka propozuar një rol:

“Pas disa vitesh u takuam në një ngushëllim, më propozoi për një rol. I thashë ‘patjetër’ dhe i jap adresën e e-mail. Prita skenarin dhe hiç.”

Historia vijon me një kthesë të papritur, pasi vetëm pas shumë vitesh ajo mori një telefonatë për një rol tjetër:

“Pas shumë vitesh më vjen një telefonatë dhe më propozojnë një rol që e pranova. Shkova dhe atje gjej Bjordin në tavolinë. E pranova rolin, filluam të kishin probleme si aktor-regjisor”, rrëfen ajo.

Pavarësisht nisjes jo fort premtuese dhe përplasjeve në punë, duket se pikërisht bashkëpunimi profesional i afroi, duke u kthyer më pas në një histori dashurie.