Arben Ahmetaj padit Qeverinë Shqiptare në Strasburg

Ish-ministri i Financave dhe ish-zëvendëskryeministri, Arben Ahmetaj, ka depozituar një padi kundër qeverisë shqiptare në Gjykatën Evropiane të të Drejtave të Njeriut në Strasburg, duke e akuzuar për shkelje të imunitetit parlamentar dhe të së drejtës për privatësi gjatë hetimeve të zhvilluara ndaj tij nga SPAK.

Sipas dokumenteve zyrtare, padia është depozituar më 8 maj 2024, dhe qeveria shqiptare e ka marrë njoftimin zyrtar më 6 tetor 2025.

Akuza lidhet me kontrollin e kryer më 9 mars 2023 në banesën e Ahmetajt, si dhe me sekuestrimin e telefonit të partneres së tij, Erjola Hoxha, bazuar në një urdhër të GJKKO.

Ahmetaj pretendon se kontrolli ishte i paligjshëm, pasi në atë kohë ai ishte deputet i Kuvendit të Shqipërisë, dhe sipas nenit 73, pika 2 të Kushtetutës, banesa e një deputeti nuk mund të kontrollohet pa miratimin paraprak të Kuvendit.

Në ankesën e tij, ish-ministri deklaron se nuk kishte asnjë mjet efektiv ligjor për të kundërshtuar urdhrin e kontrollit dhe sekuestrimit, duke pretenduar shkelje të:

• Neni 8: e drejta për respektimin e jetës private dhe banesës.

• Neni 13: e drejta për një mjet juridik efektiv.

Në këtë kontekst, Gjykata e Strasburgut i ka kërkuar qeverisë shqiptare që të sqarojë:

1. Nëse kontrolli i banesës së Ahmetajt është kryer në përputhje me Kushtetutën shqiptare dhe me rregullat e imunitetit parlamentar.

2. Nëse ligjet dhe praktika gjyqësore shqiptare ofrojnë mjetet e mjaftueshme për të ankuar vendimet e tilla të kontrollit dhe sekuestrimit.

Dokumentet zyrtare të padisë dhe kërkesat e Gjykatës janë bashkëngjitur për konsultim.