“Iku më la në vetmi”

Një histori e dhimbshme personale, larg sallave të gjyqit dhe debateve publike, ka dalë në dritë nga vetë avokati i njohur Saimir Vishaj. Ai ka zbuluar se martesa e tij shumëvjeçare ka marrë fund në një nga momentet më të vështira të jetës së tij, pikërisht gjatë përballjes me një sëmundje të rëndë.

Në një rrëfim emocional, Vishaj bën me dije se bashkëshortja e tij ka vendosur të largohet, duke çuar në finalizimin e divorcit në Gjykatën e Tiranës. Një ndarje që, sipas tij, nuk erdhi në kohë të qeta, por në një moment kur ai kishte më shumë se kurrë nevojë për mbështetje.

“Vetmia është gjëja më e rëndë që i ndodh njeriut,” – shprehet ai, duke rikthyer vëmendjen te rrugëtimi i jetës së tij, nga familja ku u rrit, te roli si baba i dy djemve, e deri te shembja e një bashkëjetese 35-vjeçare.

Në fjalët e tij ndihet jo vetëm dhimbja e ndarjes, por edhe zhgënjimi për mënyrën se si ajo ndodhi. Vishaj thekson se gjithçka ndryshoi pas përballjes me sëmundjen, duke lënë të kuptohet se largimi i ish-bashkëshortes erdhi pikërisht në momentin më të brishtë.

“Kur ishim mirë s’kishte vetmi… tashmë vetmia u ul këmbëkryq në shtëpinë time,” – rrëfen ai, duke përshkruar një realitet të ri, të mbushur me boshllëk emocional.

Historia e tij hedh dritë mbi një dimension shpesh të padukshëm të jetës së figurave publike: betejat personale që zhvillohen larg syrit të publikut, aty ku fama dhe karriera nuk mjaftojnë për të shmangur dhimbjen njerëzore.