Balluku rikthehet në PS, zbardhen porositë e fundit të Ramës

Deputetët e Partisë Socialiste janë udhëzuar nga kryeministri Edi Rama të vazhdojnë punën në komisionet e posaçme parlamentare për Reformën Zgjedhore dhe Reformën Territoriale, pavarësisht paralajmërimit për bojkot nga opozita. Ky orientim u dha gjatë mbledhjes së grupit parlamentar socialist këtë të hënë në Kryesinë e Kuvendit.

Në takimin e zhvilluar, ku morën pjesë gjithashtu zëvendëskryeministrja Belinda Balluku, e rikthyer së fundmi në detyrë pas vendimit të Gjykatës Kushtetuese që anulloi pezullimin e saj, deputetëve u theksua se maxhoranca duhet të vijojë përpara me agjendën e reformave, në përputhje me angazhimet e Shqipërisë në procesin e integrimit europian, duke mos lejuar vonesa.

Mbledhja nisi në orën 10:00 dhe konsiderohet praktikisht e fundit e grupit parlamentar të PS-së para seancës përmbyllëse të Kuvendit, e planifikuar më 18 dhjetor. Përveç agjendës së zakonshme, diskutimet u përqendruan edhe te zhvillimet e fundit politike dhe institucionale.

Kreu i Grupit Parlamentar të PS-së, Taulant Balla, deklaroi pas përfundimit të mbledhjes se opozita nuk mund të pengojë punën e dy komisioneve të posaçme dhe ftoi për reflektim: “Vendimi i tyre për të mos marrë pjesë ka qenë emocional. Partia Socialiste nuk pranon kërcënime apo shantazhe. Me historinë që ne ikim, nuk vijmë dhe votojmë; ata të shohin punën e vet, ne punën tonë.”

Balla theksoi gjithashtu rëndësinë e momentit për anëtarësimin e Shqipërisë në Bashkimin Europian dhe synimin e maxhorancës për të përfunduar procesin brenda vitit 2027. Ai theksoi se PS nuk do t’i nënshtrohet asnjë lloj presioni politik përmes komisioneve apo votimeve në Kuvend.