Bardhi: Balluku kryeministre de fakto, Rama peng i saj

Deputeti i Partisë Demokratike, Gazment Bardhi, ka reaguar me tone të ashpra pas shfaqjes së parë publike të kryeministrit Edi Rama dhe zv/kryeministres Belinda Balluku që nga data 31 tetor, kur Balluku u mor e pandehur nga SPAK.

Në një postim në rrjetet sociale, Bardhi shkruan:

“Aritmetika politike e korrupsionit!
Prej sot, de fakto kryeministre e Shqipërisë është një e pandehur nën akuzë penale dhe në hetim nga SPAK. Shfaqja së bashku për herë të parë e Edi Ramës dhe Belinda që nga 31 Tetori, kur Belinda Balluku u mor e pandehur, nuk lë më vend për dyshim se kryeministri është peng dhe vepron nën urdhrat e saj.

Edi Rama është i pafuqishëm ta largojë, sepse të dy janë bashkë në aferën e Llogarasë. Janë bashkë në korrupsion. Bashkë në pakte mafioze heshtjeje.

Kjo është aritmetika politike e korrupsionit. Aty ku numri 2 i qeverisë është i pandehur dhe ende në detyrë, numri 1 i qeverisë është i kapur.”

Reagimi i Bardhit vjen në një moment kur hetimet ndaj zv/kryeministres Balluku për tenderin e tunelit të Llogarasë kanë nxitur debate të ashpra në skenën politike shqiptare, duke shtuar tensionin mbi mënyrën se si po trajtohen figurat e larta të pushtetit nga drejtësia.