Berisha bëhet pishman: Nuk do ulem në tryezë me Ramën!

Kryetari i Partisë Demokratike, Sali Berisha, ka deklaruar se nuk do të ulet në një tryezë me kryeministrin Edi Rama për Reformën Zgjedhore. Ky reagim vjen pas dakordësisë PS-PD në Kuvend, e cila shënoi edhe ngritjen e Komisionit të Posaçëm Parlamentar për këtë reformë.

Berisha theksoi se mbështet idenë e krijimit të dhomës së Senatit dhe reduktimin e numrit të deputetëve në Kuvend, çështje që sipas tij do të diskutohet brenda komisionit, me përfaqësues të opozitës dhe mazhorancës.

Kur u pyet nëse është i gatshëm të ulet me kryeministrin Rama për Senatin, Berisha u shpreh:

“Nuk kam thënë atë. Më vjen keq që e shtroni. Ka një komision parlamentar. Ai komision dhe ai ligj nuk parashikon aspak, në asnjë rrethanë, uljen time me Edi Ramën. Ai parashikon që përfaqësuesit e të dy partive në komisionin për zgjedhjet të diskutojnë edhe këto çështje, çështjen e Senatit. Po u pranua Senati, vetvetiu numri i deputetëve do reduktohet. Dhe unë jam për këtë variant.”

Berisha shtoi se ideja e Senatit nuk është e tij, por fillimisht është propozuar nga i ndjeri Sabri Godo, duke theksuar se vendi mund të ketë një Senat me një numër më të reduktuar deputetësh për të shmangur rritjen e faturës fiskale.

Deklarata e kryedemokratit pasqyron qëndrimin e opozitës mbi dialogun me mazhorancën dhe tregon qartë se ai favorizon diskutimet brenda mekanizmave institucionalë, pa ulje direkte me kryeministrin.