Biden paralajmëroi se Irani po kërcënon ta kryejë një “sulm të madh”, pas një sulmi kundër konsullatës iraniane në Siri para 10 ditëve, për të cilin Teherani e fajëson Izraelin.
“Ne do të bëjmë gjithçka që mundemi për ta mbrojtur sigurinë e Izraelit”, tha Biden.
Të mërkurën, lideri suprem të Iranit, Ayatollah Ali Khamenei, tha se sulmi i Izraelit në Damask ishte i barasvlershëm me një sulm kundër vetë Iranit.
“Kur ata e sulmuan zonën e konsullatës sonë, ishte sikur të na e sulmonin territorin tonë”, tha Ali Khamenei në një fjalim televiziv.
“Regjimi i lig duhet të ndëshkohet, dhe do të ndëshkohet”, paralajmëroi ai.
CBS News raportoi më 5 prill se inteligjenca amerikane ka lënë të kuptohet se Teherani është duke planifikuar një sulm që do të përfshijë dronë Shahed dhe raketa lundruese.
Nuk dihet caku e as koha e sulmit të mundshëm, por goditja e një ndërtese diplomatike izraelite do të ishte përgjigje proporcionale, thuhet në raport.
Biden u zotua ta mbështesë Iranin duke folur për gazetarë në Shtëpinë e Bardhë të mërkurën vonë, ku e priti kryeministrin japonez, Fuimo Kishida.
“Siç i thashë kryeministrit [të Izraelit Benjamin] Netanyahu, përkushtimi ynë ndaj sigurisë së Izraelit kundër këtyre kërcënimeve nga Irani dhe përfaqësuesit e tij, është i palëkundshëm – më lejoni ta them prapë: i palëkundshëm”, tha Biden./REL
