Burri i Elisës, mori banesë si “i pastrehë” nga qeveria “Berisha”

Ish-Drejtoresha e Doganave, ish-Ministrja e Marrëdhënieve me Parlamentin, ish-Kryetare e Kuvendit dhe ish-Ministrja e Jashtme, Elisa Spiropali, ngjitjen në karrierë e ka shoqëruar me qëndrime agresive ndaj bëmave të Sali Berishës gjatë pushtetit e gjatë 13 viteve opozitë.

Shumë shpejt, sidomos pasi e quajti Edi Ramën “Skënderbe”, Elisa krijoi imazhin e rremë të “rilindëses idealiste me figurë të pastër dhe të pakorruptuar e pa kompromise pazaresh” me ish-pushtetin e PD-së e të PS-së.

Fakti është ky: me Vendim Nr. 72, datë 20 dhjetor 2011 të Këshillit Bashkiak të Fierit, në atë kohë i drejtuar nga PD me kryetar Vasil Ndrekon, bashkëshorti i Elisa Spiropalit ka marrë banesë si “i pastrehë”, me fonde dhe listë të posaçme të miratuar nga Sali Berisha.

Trajtimi me banesë i familjeve të pastreha në Fier u bë me Vendim Nr. 37, datë 21 korrik 2011; vendim në të cilin Salarjon Totaj nuk ishte në listë, sepse realisht nuk ishte i pastrehë dhe nuk ishte familje në nevojë, pasi kishte shumë të ardhura financiare.

Por 5 muaj më pas, konkretisht në dhjetor 2011, qeveria “Berisha” i dërgoi Bashkisë së Fierit një fond dhe listë emrash të shtuar për t’u trajtuar me banesa si “të pastrehë”, mes të cilëve ishte futur emri Salarjon Luan Totaj, bashkëshorti i Elisa Spiropalit.

Shtimi i emrit të bashkëshortit të Elisa Spiropalit me vendim e listë të posaçme nga ish-kryeministri Sali Berisha, dhe miratuar nga Këshilli Bashkiak i Fierit që kishte shumicën dhe drejtohej nga PD, tregon se Elisa ka qenë e preferuar e “tepsisë” së pushtetit “Berisha”.

Ndoshta, te ish-kryeministri Sali Berisha për t’i dhënë banesë si gjoja “i pastrehë” duke falsifikuar dokumentet, ka ndërhyrë miku i tij Gramoz Ruçi, i cili e ka nip bashkëshortin e Elisa Spiropalit dhe njëherësh e ka ortak me të birin Ledian Ruçi në koncesionin e fotovoltaikëve në bregdetin e Semanit.

Por, Elisa dhe bashkëshorti Salarjon Totaj, megjithëse kanë përfituar banesë si “të pastrehë”, vazhdojnë të deklarojnë se janë “të pastrehë”.

Ky është vetëm një nga përfitimet e fshehura, ndër shumë përfitime të tjera me fonde e dhjetra hektarë tokë shtetërore me koncesion për 99 vjet; aferat në Kryesinë e Kuvendit, Ministrinë e Jashtme, pa harruar bëmat kur drejtonte doganat, për të cilat do të flasim në vijim./Pamfleti