Çfarë po ‘zihet’ brenda PS-së? Spiropali ‘ngre bazën’ e saj në ‘Bllok’

Zhvillimet e fundit në skenën politike kanë rikthyer në vëmendje emrin e Elisa Spiropalit, teksa lëvizjet e saj të fundit po interpretohen si sinjale të një distancimi të mundshëm nga drejtimi aktual i Partisë Socialiste.

Sipas burimeve mediatike, prej disa javësh Spiropali ka marrë me qira një ambient në një nga zonat më të frekuentuara të ish-Bllokut në Tiranë. Në katet e sipërme të kësaj godine, thuhet se është organizuar një hapësirë pune që po përdoret për takime të shpeshta me figura të njohura të politikës.

Burime të ndryshme raportojnë se në këtë ambient janë parë të hyjnë dhe të dalin disa ish-ministra të qeverisë Rama, të cilët aktualisht mbajnë mandate si deputetë në Kuvend. Këto lëvizje kanë nxitur interpretime se mund të jetë duke u ndërtuar një qendër alternative komunikimi politik, jashtë strukturave zyrtare të Partisë Socialiste.

Spekulimet për një ftohje të marrëdhënieve mes Spiropalit dhe kryeministrit Edi Rama janë shtuar edhe më tej pas disa zhvillimeve të fundit. Qëndrimet e saj në rrjetet sociale, si dhe mungesa në një prej seancave parlamentare ku socialistët mbështetën Belinda Ballukun, janë parë nga analistë si shenja të një distance në rritje me lidershipin aktual.

Ky perceptim është përforcuar edhe nga largimi i saj nga posti i ministres së Jashtme, një moment që shumë e konsiderojnë si pikë kthese në rrugëtimin e saj politik. Megjithatë, deri në këto momente nuk ka asnjë reagim zyrtar nga vetë Spiropali që të konfirmojë këto zëra apo ekzistencën e një grupimi të ri politik.

Për momentin, gjithçka mbetet në nivel raportimesh dhe interpretimesh. Mbetet për t’u parë nëse kjo hapësirë e re do të shërbejë thjesht si zyrë pune, apo do të marrë një rol më të gjerë në zhvillimet e brendshme të Partisë Socialiste në vijim.