Në një ndeshje spektakolare me plot gola, rivalitet dhe emocione, Barcelona dhe Inter u ndanë në barazim me rezultatin 3-3 në sfidën e parë të gjysmëfinales së Ligës së Kampionëve, e zhvilluar mbrëmjen e djeshme në stadiumin olimpik ‘Lluís Companys’.
Ky spektakël futbollistik, i mbushur me kthesa dramatike dhe gola të bukur, ka lënë gjithçka të hapur për ndeshjen e kthimit, e cila do të luhet më 6 maj 2025 në stadiumin Giuseppe Meazza në Milan.
Ndeshja nisi me një ritëm të lartë, ku Interi tregoi agresivitet të menjëhershëm. Marcus Thuram shënoi golin e parë të ndeshjes që në minutën e parë me finte, duke i dhënë Interit një avantazh të hershëm.
Sulmi i shpejtë i Interit vazhdoi, dhe Denzel Dumfries dyfishoi epërsinë në minutën 21, duke shfrytëzuar një mundësi në zonën e Barcelonës. Megjithatë, Barcelona, e udhëhequr nga trajneri Hansi Flick, nuk u dorëzua.
Lamine Yamal, talenti i ri i katalanasve, shënoi një gol të bukur në minutën 24, duke ngushtuar rezultatin. Ferran Torres barazoi në 2-2 në minutën 38, duke mbyllur një pjesë të parë të mbushur me aksion.
Pjesa e dytë solli më shumë rivalitet. Interi rimori epërsinë në minutën 63, kur Denzel Dumfries shënoi golin e tij të dytë personal dhe të tretin për skuadrën e tij, duke treguar rëndësinë e tij në skemat sulmuese të trajnerit Simone Inzaghi.
Barcelona u përgjigj shpejt, teksa Raphinha me një goditje të fortë nga jashtë zonës në minutën 65, goditi traversën dhe topi u përplas në shpinën e portierit të Interit, Yann Sommer dhe përfundoi në rrjetë. Goli u konsiderua si autogol.
Të dy ekipet vijuan të sulmonin deri në fund, por asnjë prej tyre nuk arriti të shënonte golin e fitores.
