Danimarka i jep fund traditës 400 vjeçare, dorëzon letrën e fundit me postë

Më 30 dhjetor, shërbimi postar i Danimarkës do të dorëzojë letrën e fundit, duke mbyllur përfundimisht një traditë mbi 400-vjeçare. Vendimi shënon fundin e një epoke historike për komunikimin postar në vend.

Lajmi u bë publik më herët gjatë këtij viti nga PostNord, kompania e themeluar në vitin 2009 si rezultat i bashkimit të shërbimeve postare të Suedisë dhe Danimarkës. Sipas njoftimit zyrtar, kompania do të shkurtojë rreth 1.500 vende pune në Danimarkë dhe do të heqë nga përdorimi po aq kuti postare të kuqe, një simbol i njohur për dekada me radhë.

PostNord e justifikon këtë vendim me digjitalizimin e përshpejtuar të shoqërisë daneze. Kërkesa për dërgesa letrash ka rënë ndjeshëm, ndërsa blerjet online kanë sjellë rritje të madhe të dërgesave të pakove, duke zhvendosur fokusin e shërbimit postar.

Danimarka konsiderohet një nga vendet më të digjitalizuara në botë. Në 25 vitet e fundit, dërgimi i letrave ka rënë me mbi 90 për qind. Ndërkohë, vetë kutitë postare të çmontuara janë kthyer në objekte interesi: 1.000 prej tyre u shitën brenda vetëm tre orësh, me çmime që varionin nga 1.500 deri në 2.000 korona daneze. Një seri tjetër prej 200 kutish pritet të dalë në ankand në muajin janar. Kompania ka njoftuar gjithashtu se për një periudhë të kufizuar do të rimbursohen pullat daneze të papërdorura.

Megjithatë, dërgimi i letrave nuk do të zhduket plotësisht. Nga 1 janari, kompania Dao do të zgjerojë aktivitetin e saj, duke rritur numrin e letrave të dorëzuara nga rreth 30 milionë në 80 milionë në vit. Qytetarët do të duhet t’i dorëzojnë letrat në pikat e shërbimit Dao ose të paguajnë një tarifë shtesë për mbledhje në shtëpi, ndërsa pagesa e postës do të kryhet online ose përmes aplikacionit.

Ligji danez parashikon që shërbimi i dërgimit të letrave duhet të ekzistojë patjetër. Kjo do të thotë se, në rast se Dao do të ndërpriste aktivitetin, qeveria do të detyrohej të caktonte një operator tjetër. Autoritetet theksojnë se për qytetarët nuk do të ketë ndryshim praktik, por vetëm një ndërrim kompanie, me ndikim më tepër emocional dhe simbolik.

Ekspertët paralajmërojnë se varësia e thellë nga komunikimi digjital e bën gjithnjë e më të vështirë kthimin pas. Në Danimarkë, pjesa më e madhe e komunikimeve zyrtare zhvillohet përmes sistemit kombëtar të identitetit digjital MitID. Rreth 97 për qind e popullsisë mbi 15 vjeç është e regjistruar në këtë sistem dhe vetëm 5 për qind kanë zgjedhur të marrin ende postë fizike.

Megjithatë, ka edhe një prirje interesante: shkrimi i letrave po rikthehet te të rinjtë. Studimet tregojnë se grupmosha 18–34 vjeç dërgon dy deri në tre herë më shumë letra se grupet e tjera, si një reagim ndaj mbingopjes nga komunikimi digjital. Sipas studiuesve, një letër fizike sot ka një vlerë të veçantë, pasi përfaqëson kohë, përkushtim dhe vëmendje personale.

Duke njoftuar vendimin, zëvendësdrejtori ekzekutiv i PostNord Danimarkë, Kim Pedersen, pranoi se mbyllja e këtij kapitulli historik ishte e vështirë, por e pashmangshme, duke theksuar se danezët janë bërë gjithnjë e më digjitalë dhe se tregu i letrave nuk është më ekonomikisht i qëndrueshëm.