“E hëna blu”, sot dita më e trishtuar e vitit!

E hëna e tretë e janarit njihet shpesh si “Blue Monday”, një emërtim simbolik për atë që konsiderohet si dita më e rënduar emocionalisht e vitit. Këtë vit, ajo përkon me ditën e sotme dhe shoqërohet me një sërë faktorësh që ndikojnë në gjendjen psikologjike: temperaturat e ulëta të dimrit, mbyllja e kapitullit të festave, rikthimi në ritmin e zakonshëm të punës dhe zhgënjimi që vjen kur synimet e Vitit të Ri duken të vështira për t’u realizuar.

Koncepti i “Blue Monday” u bë i njohur rreth vitit 2005, kur psikologu britanik Cliff Arnall hodhi idenë e një formule që, sipas tij, përcaktonte ditën më të trishtë të vitit. Megjithatë, kjo teori është kundërshtuar gjerësisht nga komuniteti shkencor. Psikologët theksojnë se nuk ekziston një bazë e mirëfilltë shkencore që mund të lidhë gjendjen emocionale të njerëzve me një datë të vetme në kalendar, duke e cilësuar “Blue Monday” më shumë si një konstrukt mediatik sesa një realitet psikologjik.

Pavarësisht debatit, kjo ditë shërben si një kujtesë e mirë për të vënë në qendër vëmendjen shëndetin mendor. Ekspertët sugjerojnë që periudha e janarit të shfrytëzohet për reflektim, për të pranuar emocionet e vështira dhe për të ushtruar më shumë kujdes ndaj vetes.

Specialistët e mirëqenies këshillojnë disa hapa praktikë për ta kaluar më lehtë këtë fazë: lëvizje të rregullt fizike, ushqyerje të balancuar të pasur me fruta, perime dhe vitaminë D, kufizim të konsumit të alkoolit, si dhe ruajtje të kontakteve sociale. Angazhimi në hobi apo projekte të reja shihet gjithashtu si një mënyrë efektive për të thyer monotoninë. Sipas ekspertes së mirëqenies Leona Burton, vendosja e objektivave të qarta dhe ndarja e tyre në hapa të vegjël ndihmon ndjeshëm në rikthimin e motivimit dhe në ndërtimin e një qëndrimi më pozitiv.