E kallëzoi Taulant Balla për privatizimin e “Kompleksit Partizani”, gjykata urdhëron sekuestrimin e pasurive të Maltezit

Malltezi ishte duke pritur bashkëshorten e tij e cila ishte duke u kthyer nga një vend i Bashkimit Europian, kur është ndaluar në ambientet e aeroportit të Rinasit nga autoritetet që i komunikuan akuzat.

Mësohet po ashtu se urdhri për ndalimin e dhëndrit të ish-kryeministrit Sali Berisha është firmosur nga prokurori i posaçëm Arben Kraja.

Ende nuk dihet arsyeja e ndalimit të tij, ndërsa detaje të reja pritet të dalin në vijim.

Jamarbër Malltezi u ndalua mbrëmjen e sotme (21 Tetor) nga autoritetet, ndërsa i është caktuar edhe masa e sigurisë “arrest me burg”. Kjo masë është pasuar me urdhrin për sekuestrimin e pasurive të tij.

Pas ndalimit Malltezit, SPAK ka vendosur masën e sigurisë “arrest me burg” ndaj Fatmir Bektshit, ndërtues në ish-kompleksin “Partizani”.

GJKKO ka caktuar masë sigurie edhe për ish-kryeministrin Sali Berisha. Ndaj Berishës është caktuar detyrim paraqitje dhe ndalim jashtë shtetit.

Hetimet për privatizimin e kompleksit “Partizani”, nisën pas një kallëzimi penal të bërë më 17 nëntor 2020, nga ministri i Brendshëm Taulant Balla, në atë kohë kreu i grupit parlamentar të PS.

Balla, asokohe kallëzoi për shpërdorim detyre ish-kryeministrin Berisha, dhëndrin e tij Jamarbër Malltezi dhe ish-ministri Arben Imami.

Ata akuzohen në lidhje me privatizimin e rreth 10.000 m2 të ish-kompleksit sportiv “Partizani”, në qendër të Tiranës, truall i cili para vitit 2012 ishte në pronësi të Ministrisë së Mbrojtjes.