E rëndë Ra nga tarraca e azilit, ndërron jetë 72-vjeçarja në Gjirokastër

Një ngjarje e rëndë është regjistruar mesditën e sotme në Gjirokastër, ku një grua 72-vjeçare ka humbur jetën pas një rrëzimi nga tarraca e institucionit ku ishte e akomoduar.

Viktima, e identifikuar si Sheqere Zeko, po qëndronte në ambientet e jashtme të Azilit të Pleqve, kur dyshohet se ka humbur ekuilibrin dhe ka rënë nga një lartësi prej rreth shtatë metrash. Si pasojë e përplasjes, ajo ka pësuar dëmtime të shumta trupore, përfshirë fraktura në shpatull dhe në gjymtyrët e poshtme.

Menjëherë pas ngjarjes, e moshuara është transportuar me urgjencë drejt Spitali Rajonal i Gjirokastrës, ku ka marrë ndihmën e parë mjekësore dhe i është nënshtruar ekzaminimeve përkatëse. Burime nga bluzat e bardha bëjnë me dije se në momentet fillestare parametrat jetësorë paraqiteshin relativisht të stabilizuar.

Megjithatë, gjendja shëndetësore e 72-vjeçares ka pësuar përkeqësim të papritur rreth një orë më vonë, çka ka detyruar stafin mjekësor të vendosë transferimin e saj drejt Spitali Memorial i Fierit për trajtim më të specializuar. Fatkeqësisht, ajo nuk ka arritur t’i mbijetojë plagëve dhe ka ndërruar jetë gjatë transportimit.

Rrethanat e plota të ngjarjes pritet të sqarohen nga autoritetet përkatëse.