SPAK e çon në gjyq, hetimi për pastrim parash vijon
VIDEO
TIRANË – Ish-kryebashkiaku i Kavajës, Elvis Roshi, është zyrtarisht i akuzuar nga Prokuroria e Posaçme Kundër Korrupsionit dhe Krimit të Organizuar (SPAK) për shpërdorim të detyrës, në bazë të nenit 248 të Kodit Penal. Pas përfundimit të hetimeve paraprake, SPAK i ka komunikuar akuzën Roshit në prani të avokatit të tij mbrojtës, ndërsa pamjet filmike dhe dokumentet shoqëruese janë dorëzuar tashmë në dosjen e prokurorisë.
Sipas SPAK, Roshi dyshohet se ka kryer veprime të paligjshme gjatë drejtimit të Bashkisë së Kavajës, duke marrë vendime administrative që sollën dëme ekonomike dhe përfitime të padrejta, në kundërshtim me ligjin. Burime pranë hetimit konfirmojnë se shkeljet janë të dokumentuara për periudhën janar 2013 – dhjetor 2014, dhe u zbuluan pas një auditi të KLSH-së.
Në fokus të hetimit janë vendime për 12 tendera publike, të cilët përfshijnë:
- Rikonstruksionin e qendrës së qytetit,
- Ndërtimin e disa rrugëve dytësore,
- Blenien dhe mbjelljen e pemëve dekorative.
Në të paktën dy raste, autoritetet konstatuan shkelje të standardit të barazisë në garë, ku operatorët me ofertat më të ulëta janë skualifikuar në mënyrë të dyshimtë, në favor të kompanive të tjera.
Sipas nenit 248 të Kodit Penal, shpërdorimi i detyrës dënohet me gjobë ose burgim deri në 7 vjet, nëse nuk përbën vepër penale tjetër.
Ndërkohë, Roshi nuk e ka mbyllur ende llogarinë me drejtësinë. Burime konfidenciale brenda SPAK kanë bërë me dije për Publik.al se ndaj tij po vijon një hetim i veçuar për pastrim parash, i cili lidhet me dyshime mbi transaksione financiare të dyshimta, pronësi të pajustifikuara dhe letërporosi ndërkombëtare në proces.
Hetimi për këtë çështje është ende në zhvillim dhe mund të zgjerohet, në varësi të të dhënave të reja që do të vijnë nga institucionet partnere jashtë vendit.
Dosja ndaj Roshit vjen në një kohë kur SPAK ka intensifikuar hetimet ndaj zyrtarëve të lartë të pushtetit vendor, veçanërisht për abuzime me fondet publike dhe procedurat e prokurimeve.
