Pas një gare të gjatë dhe polemikash të shumta rreth transparencës dhe pavarësisë së institucionit publik më të rëndësishëm të transmetimit, Eni Vasili është zgjedhur sot drejtoreshë e përgjithshme e Radio Televizionit Shqiptar (RTSH).
Vendimi u mor nga Këshilli Drejtues i RTSH-së, ku Vasili mori 7 vota pro nga anëtarët, duke siguruar shumicën e nevojshme për të zënë postin më të lartë ekzekutiv të institucionit.
Zgjedhja e saj vjen në një moment kritik për RTSH-në, mes akuzave për politizim, mungesë profesionalizmi dhe shfrytëzim të burimeve publike për interesa të ngushta politike. Emri i Eni Vasilit është përfolur prej ditësh si favoritja e maxhorancës për të marrë në kontroll drejtimin e RTSH, çka ka ngjallur dyshime mbi integritetin dhe pavarësinë editoriale që do të mund të garantojë në këtë rol.
Eni Vasili, me një karrierë të gjatë në televizionin privat dhe me një profil të spikatur si moderatore e emisioneve politike, do të ketë përpara një sfidë të madhe: të transformojë RTSH-në nga një transmetues i paragjykuar politikisht, në një media publike në shërbim të qytetarëve.
Në të kaluarën, zgjedhjet e drejtuesve të RTSH kanë qenë shpesh të kontestuara, dhe mbetet për t’u parë nëse ky emërim do të shënojë një kthesë për institucionin, apo do të thellojë krizën e besimit në mediat publike shqiptare.
